ARGIA.eus

2020ko uztailaren 09a

Iran-AEB tentsioa berriro berotzen, petrolioaren prezioa eta koronabirusa tarteko

  • Irango Errepublika Islamiarrak lurraren orbitan jarri du lehenbiziko satelite militarra eta egun berean Donald Trumpek mehatxu egin dio Pertsiar Golkoan dauzkan itsasontzi guztiak suntsituko dizkiola, egun batzuk lehenago gerra-ontzi irandar txiki batzuk militar yankien ondoan ibili ostean. Berriro tentsioa gori Ekialde Hurbilean eta, menturaz, Donald Trumpen tentazioa hor erasoz lotzeko berriro petrolioaren prezioa igoaraztea eta AEBetako fracking industria salbatzea.

     

ARGIA @argia
2020ko apirilaren 23a
Iranek astazkenean ipini du orbitan Noor satelite militarra. (IFP News)

Asteazkenean Irango Iraultzaren Goardiek jakinarazi zuten Noor (Argia) satelite militarra ipini zuela orbitan, herrialde horrek daukan gisa horretako lehenbizikoa. AEBetako zenbait hedabidek nabarmendu du ez dela keinu hutsal bat izan,AEBetako zenbait hedabidek nabarmendu du ez dela keinu hutsal bat izan, iraniarrek erakutsi nahi izan dutela gai direla satelite militar bat abian jartzeko AEBek eta honen aliatuen gogoz kontra izanik ere. Hossein Salami general iraniarrak adierazi du: "Gaur egun munduko armadarik indartsuenek ez daukate defentsa tresneria osatuta baldin eta ez badaukate teknologia espazialik eta guretzako behar estrategikoa zen teknologia hori eskuratzea".

Berehala egin dute protesta AEBek eta Israelek, salatuz Nazio Batuen Erakundeak espreski debekatzen diola Irani misil balistikoak erabiltzea horrelakorik egiteko.

Aurretik, joan den astean, dozena bat gerra-ontzi arin txiki iraniarrek Pertsiar Golkoko uretan egin zituzten maniobra bereziak AEBetako ontzi militar handi baten inguruetan, Iranek bere itsasoaren aldarrikapentzat aurkeztu eta amerikarrek beren kontrako probokaziotzat jo zituztenak. Une hori honela erakutsi zuten iraniarrek:

AEBetan, aldiz, honela ikusi dute:

Atzo, asteazkena, Iranek bere satelitea jaurti eta ordu batzuen tartearekin –sateliterik aipatu gabe– Donald Trumpek Twitterrez adierazi du bere militarrei agindua eman diela itsasontzi amerikarrei hurbiltzen zaien edozein ontzi iraniar suntsitzeko. Horrekin erantzuten zien joan den astean Pertsiar Golkoan gerra-ontzi txiki iraniarrek armada amerikarraren ontzien inguruan egindako keinuari. Beranduago, berriro joan den asteko liskartxoari aipamen egin zion Trumpek, COVID-19a dela eta egunero eskaintzen duen prentsaurrekoan ere: "Ez diegu berriro onartuko. Arriskuan jartzen dituzte gure ontziak, gure militar bikainak eta ekipaiak. Tiro egingo diegu uretan bertan".

 

Beste alorretan ere berotu da bi herrialdeen arteko gatazka. Iranek Nazioarteko Diru Funtsari 5.000 milioi dolarreko mailegu bat eskatu dionean COVID-19ari aurre egiteko, AEBek eragozteko ahaleginak egin dituzte, nahiz eta Europar Batasuna bera ere mailegua ematearen alde egon arrazoi humanitarioak tarteko.

Orain, ordea, AEBek eduki dezakete Ekialde Hurbilean garrak berotu nahi izateko beste motibo bat: petrolioaren prezioa. Koronabirusak ekarri duen atzeraldi ekonomikoa dela eta petrolio ekoizle asko ari baldin badira gorriak ikusten urre beltzaren prezioak hondoa jo ezinik jarraitzen duelako beheraka, AEBetako petroliogileak bereziki nozitzen ari dira kolpea. Brent petrolio estandar europarraren aldean asko jaitsi da Texas amerikarraren upela, petrolioa kobratu ez baizik eta eskuetatik kentzearen truke bezeroei pagatzeraino iritsita, hain daude petrolioz gainezka AEBetako biltegi, petrolio-ontzi eta gainerako tanke guztiak. Zenbait adituren ustetan, Trumpek Irani erasoz txori bat baino gehiago joko lituzke harri bakarrez: Iran izorratu, petrolioaren prezioa igoaraziz AEBetako lobbyari eskua bota eta... udazkenean datozkion hauteskundeetarako pixka bat hobetu koronabirusaren sarraskiak murriztu dizkion aukerak.

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!

Kanal hauetan artxibatua: Petrolioa  |  Iran  |  Gerra  |  Globalizazio neoliberala

Petrolioa kanaletik interesatuko zaizu...

Azkenak
EGILEA
Argia buletina
Egunaren laburpena
zure e-postan
Eguneraketa berriak daude