Bake Bideak argi du: "Paris eta Madril kosta ala kosta bake prozesuan sartu beharko dira". Horretara behartzeko herri mobilizazioa ezinbestekotzat joz, irailaren 19rako finkatu dute hitzordua. Goizeko 11:00etan Lapurdi, Nafarroa Beherea eta Zuberoan gaindi mobilizatu ondoan, auto-karabanen bidez Baionaruntz abiatu eta suprefetura aitzinean batuko dira.

Ion Parot, Unai Parot, Jakes Esnal eta Xistor Haramburu euskal preso politikoek 30 urte daramatzate kartzelan eta haien askatasuna exijitzeko unea ere izanen da. Igor Gonzalez Sola presoaren heriotza deitoratu ere dute, salbuespen legedia bertan behera uztea eta legea konponbide prozesuari egokitzea galdetuz.

Ekimenaren aurkezteko prentsaurrekoa egin dute irailaren 9 honetan Baionan. "Kartzela ez da bateragarria elkarbizitzaren eraikuntzarekin", Bake Bideak oroitarazi duenez eta horretarako espetxe politika aldatzeko deia berretsi dute prentsaurrekoan.