Hiru aldiz gibelatu da epaiketa Baionako Auzitegian, Tarnoseko (Landak) trenbidea okupatzea leporatzen dieten bederatzi pertsonen aurkakoa. Urriaren 7an hasi da, eta transakziozko akordioa erdietsi dute lehen egunean SNCF Frantziako Tren Zerbitzuarekin, Kazeta-n irakur daitekeenez.

SNCFk 168.000 euroko diru-zama galdegina zien trenbidea okupatzea egozten zitzaien ekintzaileei, kalte-ordain gisa, baina Bake Bideak jakinarazi duenez, bi aldeek erdibideko akordio konfidentziala sinatu dute.

2022ko uztailaren 23an, Bakegileek eta Bake Bideak deituta, 2.000 lagunek Ipar Euskal Herriko komunikazio sareak blokatu zituzten: trenbidea, aireportua eta A63 autobidea. Handik bi hilabetera Jakes Esnal eta Ion Parot askatzen zituzten, 32 urte espetxean igaro ondoren.

Epaiketa ere baliatu, auzia zertan den azaltzeko

Haritz Agirre urruñarra elkarrizketatu zuen Jenofa Berhokoirigion ARGIAko kazetariak 2023ko otsailean, epaiketa hastera zihoanean. Bera zen auziko bakegileetariko bat. Ekintzaz beraz, ulertzeko maneraz eta antolakuntzaren garrantziaz mintzo zen elkarrizketan.