Santos Indurain Nafarroako Gobernuko Osasun sailburuaren esanetan, Osasunbideak ez zuen material hori erosteko inongo konpromisorik, hark ez zuelako sinatu Sodenak, CEN enpresarien elkarteak eta Albyn bitartekaritza enpresak lotutako hitzarmena. Nafarroako Legebiltzarrean asteazken honetan azaldu zuenez, haiek hitzarmenaren gehigarri bat sinatu zuten, besterik ez, eta horren arabera, Osasunbideak soberan egondako materialaren zati bat erosteko konpromisoa bereganatu zuen. Baina eranskinean adostutako baldintzak “ez ziren bete”, azaldu zuen eta, beraz, guk ez dugu ezer erosi. Aipatu zuen, halaber, operazio hau Sodenaren ekimenez hasi zela.

Hor dago beste kosketako bat: noren ekimena izan zen? Iragan urriaren 26an Mikel Irujo Ekonomia eta Enpresa Garapenerako kontseilariak foru legebiltzarrean adierazi zuenez, CENek eskatu zion maskaren operazioa bideratzea, eta dirua aurreratzea ere bai. CENek ordea, urriaren 28an Juan Miguel Sucunzaren bidez egindako adierazpenetan, ukatu egiten du haiek gobernuari ezer erregutu ziotenik, eta Sodenak abiarazi zuela operazioa, haren webgunean argi azaltzen denez.

Irujok bere agerraldian salatu zuenez, dena den, maskarak eta bestelako osasun materiala ezin da erabili juridikoki CENen izenean dagoelako, eta hark horien erabilera blokeatzen duelako gobernuak dirurik ez eskatzeko konpromisorik hartzen ez duen arte. Irujok marra gorri hori onartezintzat jo zuen. Sucunzak ez zien erantzun Irujok egindako salaketei, baina zeharkako mehatxu egin zuen, CENek “informazio asko duela esanez”. Edozein kasutan, datozen egunetan Irujoren sailarekin bilduko direla eta gaiaz berriz hitz egingo dutela zehaztu zuen.

Navarra Sumako Cristina Ibarrolak salatu zuen ulergaitza dela Osasunbideak ez erabiltzea biltegian diren maskarak eta, aldiz, beste batzuk erostea “eta gainera gehiago ordainduta”. Ez zuen azaldu, alabaina, salerosketen prezio horiek zeintzuk izan ziren.

PSN eta Geroa Bai ika-mika

Asteazkeneko saioan argi ikusi zen PSNk gainetik kendu nahi zuela operazioaren edozelako ardura, eta Geroa Bai-k, aldiz, sozialistak operazioan sartu nahi zutela. Mikel Asian Geroa Baiko parlamentariaren aburuz, Sodenak, CENek eta Albynek egindako hitzarmena lehenxeago Sodenak eta Osasunbideak sinatutako beste baten ia berdina da, eta hark ez du arazorik sortu eta honek bai; ulergaitzak jo du, halaber, Osasunbideak materialik ez erostea, “hitzarmenean finkatutako gehienezko %10 hori ere ez zuten erosi”. Hitzarmenak horretara ez zuela behartzen aitortu zuen, baina behar “etiko eta moralik ez ote zegoen” erantsi zuen.

EH Bilduko Adolfo Araizen esanetan, Osasunbidearen parte hartzean ilungune bat dago, eta ez da ulertzen nola hasierako erosketa konpromisoa zena egun batzuetan desegiten den, gainera “dokumentazio arrastorik utzi gabe”.

Eta plazan agertutako hirugarren agintari sozialista, PSNko Ogasun kontseilari Elma Saiz izan zen. Nafarroako Enpres Publikoen Korporazioko lehendakaria ere bada eta legebiltzarrean azaldu zuenez, bazuen Sodena, CEN eta Albyenen hitzarmenaren berri, baina ez ezagutza sakonez. Sodenaren administrazio kontseiluetara badoazela, baina han ez dutela botorik eta, gainera, ez dela ematen operazioen berri sakontasun osoz. Operazioaren ardura osoa Sodenarena dela azpimarratu du, ardurak Mikel Irujo kontseilariaren esku utziz, hura baita Sodenako lehendakaria.

PSN eta Geroa Bai gobernuko indarrak ika-mika ari dira maskaren afera medio, baina orain arte ezer gutxi esan duena gobernu hori gidatzen duen María Chivite lehendakaria da. Iragan uztailean gobernuko ikuskaritzak hitzarmenak hainbat irregulartasuna zituela adierazi zuen, besteak beste, bizi zen garai berezia zela eta, gobernuaren berariazko baimena behar zuela hitzarmenak, eta ez zuela.