ELA, LAB, CCOO, ESK eta Steilas sindikatuek astearterako Araba, Bizkaia eta Gipuzkoako sektore publikoan deituriko grebak eragin handia izan du, beren hitzetan. Azaldu dutenez, aurreko bi deialdiek baino jarraipen zabalagoa izan du oraingoak, eta "arraskata ikusita", Eusko Jaurlaritzarekin negoziatzeko indarberriturik atera dira.

Lanuztea, batez ere hezkuntzan nabaritu da, baina baita garraio publikoan, EiTBko irrati eta telebista kateetan eta udal eta foru aldundietako administrazioetan ere. Esaterako, unibertsitatez kanpoko hezkuntzari dagokionez %65ekoa izan da jarraipena, sindikatu horien arabera, eta ikastetxe batzuetan "jarduera ia osorik" gelditzea lortu dute. Bestetik, dozenaka udalerritan itxita egon dira liburutegiak, kiroldegiak eta bestelako zerbitzu publikoak. Gainera, EiTBko Miramongo egoitzan grebak %80ko babesa izan du eta Eusko Trenen eta Bilboko Metroan ere "jarraipen zabala" neurtu dute.

Eguerdian manifestazioak egin dituzte sindikatuek hiriburuetan eta antolatzaileen arabera 30.000 lagun inguru bildu dira horietan, Zerbitzu publikoen alde, soldatak eta enplegua hemen adostu lelopean.

Araba, Bizkaia eta Gipuzkoako sektore publikoan egin den hirugarren greba handia izan da honakoa. Langileen ordezkariek azaldu dute azken urteetan erosahalmen galera handia jasan dutela eta soldatak %10 emendatzeko eskaria egin dute. Horrez gain, zerbitzu publikoen pribatizazioarekin eta behin behinkoetasunarekin amaitzea ere eskatzen dute, lan kargak arindu eta lanandia astean 32 ordutan jartzeko urratsak ematearekin batera, besteak beste.

Jaurlaritzak bat egin du grebaren ondorioz "kaltea jaso dutenekin"

Bingen Zupiria Eusko Jaurlaritzako bozeramaileak Gobernu Kontseiluaren osteko prentsaurrekoan onartu du grebak eragina izan duela hainbat hezkuntza zentro eta garraio zerbitzuetan, eta bat egin du "kaltea jaso duten pertsona eta familiekin". Zupiriak beste behin adierazi du Jaurlaritzak ez dituela partekatzen langile publikoek greba egiteko eman dituzten arrazoiak.

Olatz Garamendi Jaurlaritzako Gobernantza Publikoko sailburuak ere norabide berean hitz egin du. "Sektore publikoko prekarietate edo pribatizazio salaketen aurrean", lanpostu publiko berriak sortzeko eta plazak finkatzeko azken urtean egindako deialdiak gogorarazi ditu sailburuak, Onda Vasca irrati kate pribatuarekin egindako elkarrizketa batean. Irrati publikoan egun osoan musika baino ez da entzun grebaren ondorioz.

"Herritarrak eta langileak haserre daude"

"Urrian esaten ziguten ez zegoela greba egiteko arrazoirik –azaldu du LABeko Zerbitzu Publikoen Federazioko arduradunak–. Gaur ere Olatz Garamendik gauza bera bota du, baina aho txikiarekin, badakielako biztanlegoa eta langileria haserre daudela zerbitzu publikoen kalitatearekin".

Sindikatuek uste dute hirugarren deialdi honek Eusko Jaurlaritza eta gainerako erakunde publikoak behartuko dituela zerbitzu publikoak indartzera, eta gaineratu dute Espainiako Estatuko Aurrekontu Orokorren negoziazioa aukera on bat izan daitekeela "Madrilgo betoak ezabatzeko".