Iñaki Anasagastik Prime Time Media ekoiztetxeari idatzitako mezua eman du argitara Hala Bedik. Prime Time Mediak EiTBren En Jake saioa ekoizten du, besteak beste. Gasteizko irrati librearen esanetan, tertulian parte hartzen duten pertsonek 150 euro kobratzen dute saioko. Dirutan jaso ordez, telebista baten truke kobratuta, ordea, fakturatu eta deklaratu gabe geratuko litzateke.

2016ko ekainaren 8koa da mezua. “Corte Inglesean egon naiz 750 euro inguruko telebista baten bila, produktu mota horiek ekoiztetxe baten ohikoak direla uste baitut”, idazten dio Prime Time Mediari Anasagastik hitzez-hitz gazteleraz. Jarraian, erosketa egin ahal izateko eman beharreko urrats guztiak jakinarazten dizkio EAJko politikari ohiak ekoiztetxeari.

EiTBko esleipendunen “Top 10ean” kokatzen du Prime Time Media ekoiztetxea Hala Bedik, 2007-2017 epealdian. Beste izen bat eduki zuen ekoiztetxeak aurretik, 3Koma. Egun EAJren BBBko presidentea den Itxaso Atutxa edo Iñaki Anasagastiren anaia den Koldo Anasagasti zituen kideen artean.