Idoia Santamaria, Uxue Alberdi, Aixa de la Cruz eta Borja Barragueren izenekin osatu da 2020ko Euskadi Sarien irabazleen zerrenda. Ingeborg Bachmannen Aldibereko ipuin liburuaren itzulpenagatik irabazi du saria Santamariak, Kontrako eztarritik testigantza-liburuagatik jasoko du saiakera alorreko saria Alberdik; eta gaztelaniazko lanen alorrean, Aixa de la Cruzen Cambiar de idea eta Borja Barragueren Larga vida a la socialdemocracia nabarmendu dituzte sarietako epaimahaiek.

Irabazle bakoitzak 18.000 euro jasoko ditu eta beste 4.000 euro jaso ditzake egindako lana beste hizkuntza batean argitaratzen bada –itzulpenaren sarian izan ezik, noski–.

Joan den astean ezagutu ziren Euskadi Sarietako beste kategorietako irabazleak. Sari-banaketa ekitaldia azaroaren 19an egingo da Bilboko Alondegian.