2023ko Euskadi sariak irabazi dituzte Arantxa Urretabizkaia, Patxi Zubizarreta eta Joseba Larratxek

  • Azken Etxea, Zerria eta Ni ez naiz Mikel Laboa lanak saritu ditu epaimahaiak Euskarazko Literatura, Haur eta Gazte Literatura eta Ilustrazioa kategorietan hurrenez hurren. Oraindik beste lau irabazle daude jakinarazteke.


2023ko urriaren 12an - 11:18
Azken eguneraketa: 2023-10-17 09:47:05

Euskadi Literatura sariek badituzte 2023ko edizioko lehen hiru irabazleak: Arantxa Urretabizkaia, Patxi Zubizarreta eta Joseba Larratxe 'Josevisky'. Urretabizkaiak Euskarazko Literatura saria jaso du Azken etxea (Pamiela) lanagatik; Zubizarretak irabazi du, ordea, Haur eta Gazte Literatura saria Zerria (Erein) liburuari esker; eta ARGIAko kolaboratzaile Larratxe Ni ez naiz Mikel Laboa (Elkar) komikiagatik saritu dute Ilustrazioaren esparruan.

Bingen Zupiria Kultura eta Hizkuntza Politikako sailburuak eman ditu irabazleen izenak Donostiako San Telmo Museoan egindako ekitaldian. Halaber, gogoratu du oraindik beste lau sari falta direla emateko. Iragartzeke daudenak –Gaztelaniazko Literatura, Euskarazko Literatura Itzulpena, Euskarazko Saiakera eta Gaztelaniazko Saiakera–, datorren astean jakinaraziko dituzte. Euskadi Literatura sari banaketa azaroaren 15ean izango da Getxoko Muxikebarri Zentroan.

Lan berezi eta estetikoa

Arantxa Urretabizkaiaren Azken etxea lanean epaimahaikideek nabarmendu dute lanak eskaintzen duen “ezaugarri formal eta hautu estetiko berezia”. Halaber, “narrazioaren ikuspuntutik hartutako arriskuak” goraipatu ditu. Urretabizkaiak azpimarratu du, “bizitzak uzten badio” behintzat, ez dela bere azken liburua izango: “Gizarteak espero du nire adinekoak atseden hartzen arituko garela beste ezer egin gabe”.

Aldaketarako deia

Patxi Zubizarretarentzat bosgarren Euskarazko Haur eta Gazte Literatura saria da. Idazleak “memoria ariketa” gisa deskribatu du Zerria liburua. Bere esanetan, literaturak “hunkitu eta aldaraziko gaituen zerbait” izan behar du: "Sortzen ari garen gizartearekin matxinatzeko eta beste bat sortzeko". Epaimahaikideen arabera, literaturaz gozatzeko eta pertsona gisa hazteko “adibide oso egokia” da Zerria: "Gazte literaturaren sinpletasunetik eta topiko tipikoetatik urruntzen da".

Proposamen freskoa

Joseba Larratxek –ARGIAko kolaboratzailea, besteak beste– adierazi du Ez naiz Mikel Laboa lanean Donostiako artistaren bizitza marraztea “oso berezia” izan dela: "Niretzat figura garrantzitsua da”. Halaber, eskerrak eman dizkio Mikel Laboa Katedrari, lanbidean “ohikoak” ez diren baldintzetan aritzea ahalbidetu diolako. Epaimahaiak "proposamen fresko eta gogoangarria duen lan konplexua" izateagatik saritu du Larretxe. Gainera, lana goraipatu du “erreferentzia zein sinbolo kultural asko” jaso dituelako.


Kanal honetatik interesatuko zaizu: Euskadi Sariak
Euskadi Literatura Sariak banatu dituzte Getxoko Muxikebarrin

Ondorengoek irabazi dute euskarazko kategorian: Arantxa Urretabizkaia, Patxi Zubizarreta, Miren Billelabeitia, Maialen Berasategi, Joxe Mari Berasategi eta Joseba Larratxek.


Maialen Berasategi eta Joxe Mari Berasategik irabazi dute Itzulpengintzako Euskadi saria

Aita-alabek Abdulrazak Gurnah-en Paradisua liburua itzuli dute euskarara. Tanzaniarrak Literaturako Nobel saria irabazi zuen 2021ean. Miren Billelabeitiak Saiakerako Euskadi saria jaso du Norberak maite duena. Hitza gogoan, irakurketa biziz lanagatik.


2022-10-13 | ARGIA
Uxue Apaolaza, Leire Bilbao eta Maite Mutuberriarentzat Euskadi Literatura Sariak

Euskarazko Literatura saria jaso du Apaolazaren 'Bihurguneko nasa' ipuin bildumak, Euskarazko Haur eta Gazte Literatura saria Bilbaoren 'Barruko hotsak' albumak, eta Literatur Lanaren ilustrazioaren saria Mutuberriaren 'Irrimola' lanak.


2021-10-20 | ARGIA
Banatu dituzte Euskadi Sariak kategoria guztietan

Urriaren 14an jakianrazi zituzten sarietuetako zenbaiten izenak, eta asteazkenean eman dituzte ezagutzera gainontzekoak. Pello Lizarralde, Anjel Lertxundi, Joxan Elosegi, Alex Gurrutxaga, Mikel Reparaz, Txani Rodriguez eta Javier de Isusi dira 2021eko edizioko sarituak.


2021-07-12 | Ion Olano
Bazka.info
Gorka Arrese: «Bazkan arrazoiak erakutsiko ditugu inpartzialak ez izateko»
Literaturaren bideak ugariak dira, paperezkoak gehienak: liburuak, aldizkariak... Gero eta ugariagoak dira, ordea, bide elektronikoak. Bazka aldizkaria, esate baterako. Paperean sortua 1999an, bigarren zenbakirako desagertu zen, banaketa arazoak medio. Aurten ikusi du berriro... [+]

Eguneraketa berriak daude