Bingen Zupiria Eusko Jaurlaritzako Kultura eta Hizkuntza Politika sailburuak urriaren 14an eman zituen ezagutzera 2021eko Euskadi Sariak jasoko zituztenen artean zenbait izen, baina ez guztiak. Urriaren 20ko asteazkenez jakinarazi ditu iragartzear ziren sarituen izenak.

Duela astebete jakin zen zein ziren narratiban, haur eta gazte literaturan eta itzulpengintzan golardatutako lanak. Aipatutako lehen kategorian Pello Lizarralderen Argiantza eleberriak eraman du saria, Anjel Lertxundiren Haltzaren muinoa nabarmendu da haur eta gazte literaturan, eta Joxan Elosegiren Nik kantatu eta dantza egiten du mendiak saritu da itzulpengintzan.

Berriki eman dituzte ezagutzera falta ziren kategorietako sarituen izenak. Saiakera Euskaraz modalitatean Alex Gurrutxaga Muxikari eman diote saria, Xabier Leteri buruz idatzitako Xabier Lete. Aberriaren poeta kantaria lanagatik. Gaztelaniazko saiakeren artetik Mikel Reparazen Las grietas de América hautatu du epaimahaiak, eta Literatura Gaztelaniaz eta Lan Literarioen Ilustrazioa ataletan, hurrenez hurren, Txani Rodriguezen Los últimos románticos eta Javier de Isusiren Transparentes. Historias del Exilio colombiano lanak izan dira sarituak.

Amaia Bacigalupek, Katixa Agirrek, Juan Ramon Makusok, Patxi Juaristik eta Aitor Zuberogoitiak osatu dute sariketako epaimahaia.