“Ertzaintzak eskubideak urratu dizkion herritarrari isuna jarriko diote? Hau ezin da horrela geratu”
Euskaraz hitz egiteko eskatzeagatik Ertzaintzak identifikatu zuen pertsona Mozal Legeaz zigortu dute. Astelehen goizean jakinarazi du Ernaik albistea. "Hau ezin da horrela geratu", salatu du Hizkuntza Eskubideen Behatokiak.
ARGIA Hizkuntz Eskubideen Behatokiarekin harremanetan jarri da eta lehen balorazio azkar bat eman digu Garbiñe Petriatik.
"Erabat sinesgaitza egiten zaigu. Hizkuntza eskubideen urraketa jasan duen herritarrari 600 euroko isuna jarriko diote? Bere garaian Ertzaintzak bidali zigun gutunean zioten ez zituztela hizkuntza eskubideak errespetatu eta "jardunbide egokia" eman zietela iskanbila honetan parte hartu zuten ertzainei. Hau al da jardunbide egokia?".
Behatokiak adierazi du juridikoki zer egin daitekeen begiratuko duela isuna bertan behera uzteko. "Hau ezin da horrela geratu".
Sare sozialetan Ertzaintzak bidali zuen gutuna publikatu dute.
"... AGINTE KOADROARI JARDUNBIDE EGOKIA ZEIN DEN JAKINARAZI ZAIE eta berariaz eskatu digute beraien partez BARKAMENA HELARAZTEKO". Eskubide urraketa aitortu eta 600€ isuna jartzea al da JARDUNBIDE EGOKIA? #Bidegabekeria honi aurre egiteko bidea aztertuko dugu. pic.twitter.com/EdwAxtYFSD
— Hizk. Esk. Behatokia (@behatokia) 2019(e)ko urtarrilaren 28(a)
