"Hizkuntza eskubideak, norenak?!" mahai-ingurua apirilaren 4an Arrasaten

  • Arrasate Euskaldun Dezagun elkarteak eta ARGIAk elkarlanean antolatu dute. Bilboko udaltzainen aurrean euskarari eutsi zion Arkaitz Zarragak. Berdin egin zuen Eneka Alvarezek, Donostian, ertzainen aurrean. Mozal Legeaz isuna jaso dute biek. Bi euskara irakasle eta euskaltzale hauek mintzatuko dira mahai-inguruan eta Lander Arbelaitz ARGIAko kazetariak moderatuko du. Arbelaitzek grabatu zuen Alvarezek jasandako hizkuntz eskubide urraketa, eta bi ertzainek epaitegi penalera eraman dute kazetaritza lan horregatik.

ARGIA @argia
2019ko apirilaren 02a

Apirilaren 4an, osteguna, 19:00etan Arrasateko Kulturate-n (Azoka kalea, 1) da hitzordua. ARGIAren mendeurrena ospatzeko ekitaldietako bat da, Arrasate Euskaldun Dezagun elkarteak eta ARGIAk elkarlanean antolatua. Aurrerapen modura, hona Zarraga eta Alvarezek egin zituzten adierazpenetako batzuk, Arbelaitzek ARGIAn egin zien elkarrizketan:

A. Zarraga: Kontzientzia berezia dugu horrekin. Nire kasuan, nirekin topo egin zuen udaltzaina euskaltegitik pasatakoa zen. Horrelako ikasle batzuk baditugu, hizkuntz perfilaren bila doaz, eta hori lortutakoan ez zaie axola handik harago ezer, lana dute eta kitto. Sistema honek porrot egiten duela erakusten du argi eta garbi. Administrazioa ezin da belarriprest izan, ez da nahikoa ulermen maila izatearekin. Nirekin euskarazko harreman osoa izatea nahi dut. Gainera, jakin behar dute hizkuntza eskubide batzuk daudela eta beraiek errespetatu behar dituztela, nik neuk erabakitzen dudala zein hizkuntzatan aritu. Hori agerian geratu da.

E. Alvarez: Kasu hauek ez dira isolatuak, oihartzuna lortu dute hainbat arrazoirengatik. Justu gu biok oso jakitun gara gure eskubideak zein diren. Hala ere, halakoak egunerokotasunean gertatzen dira. Kontua da euskaldunari beti dagokiola insistitzen aritzea, eskubideak gogoraraztea... zure partetik indar bat eskatzen du, ahalduntze bat, lan nekeza baita. Hala ere, jende guztia animatzen dut urraketak salatzera, eta eskubideak bermatzen ez dizkiguten artean talka hau egongo da.

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!


ARGIAk 100 urte kanaletik interesatuko zaizu...
Azkenak
EGILEA
Eguneraketa berriak daude