Amaiera berri bat du "jomugan" Hatortxu Rock festibalak. 28. edizioa egingo dute aurten, abenduaren 16an Atarrabian. Guztira hamazazpi talde bilduko dira euskal preso politiko eta hauen senideekiko elkartasuna adierazteko. “Erronka berriak ditugu, ETXERA bidean jartzeko”, aurreratu dute antolatzaileek.

Hamazazpi talde eszenaratuko dira guztira: Los Chikos del Maiz, Huntza, Tropa do Carallo, Dupla, Los Zopilotes Txirriaos, Auxili, Liher, Skabidean, Stay Homas, Streetwise, Burutik, Baizera!, Etxepe, Arkada Social, Ibil Bedi, Dj Reimy eta Dj Trapella.

Festibalaren antolatzaileek azken 24 urteetan “milaka herritarren konpromisoa eta elkartasuna” eskertu dute: “Horri esker iritsi gara, hainbeste urte eta gero, dispertsio politika krudelaren amaieraraino. Lan nekaezin horri esker heldu gara hainbeste desiratutako amaiera horretara”.

Sarrerak Hatortxu Rocken webgunean (www.hatortxurock.eus) daude salgai, 25 eurotan.