Hamar pertsona batzeko muga eta beste hainbat murrizketa Araban, Gipuzkoan eta Bizkaian

  • Asteartean bildu da lehenbizikoz osasun larrialdi egoeran erabakiak hartuko dituen Larrialdiari Aurre Egiteko Bidea (LABI) izeneko batzordea. Pilaketak ekiditea ezarri du helburu nagusitzat. Elkartzeko eskubidean, aisialdian, ostalaritzan, zahar etxeetan edo garraioan ezarri ditu murrizketak, besteak beste.


2020ko abuztuaren 18an - 15:49
Prentsaurrekoan eman dute LABI batzordearen erabakien berri. Argazkia: irekia.eus.

LABI batzordeak hartuko ditu erabakiak larrialdi egoera mantentzen den bitartean. Bileran Jaurlaritzako jarduneko lehendakaria eta sailburuak egon dira, Diputazioetako ahaldun nagusiekin batera. Bilera amaitzerakoan agerraldia egin dute Lehendakaritzan bertan Ekonomiaren Garapena eta Azpiegituretako jarduneko sailburu Arantxa Tapiak, jarduneko Osasun sailburu Nekane Murgak eta jarduneko Hezkuntza sailburu Cristina Uriartek. Tapiak eman du LABIak hartu dituen erabaki nagusien berri. Bi motakoak direla azaldu du: orokorrak, biztanle guztiei eta EAEko lurralde osoari eragiten diotenak; eta “kirurgikoak”, espazio edo eremu jakin batzuetan ezarri daitezkeenak, agerraldien edo kutsatze tasa altuen arabera.

Helburu nagusia pertsonen pilaketak ekiditea da edozein adin eta eremuetan –haur parkeak, hondartzak, aisialdi guneak...–, pilaketak jotzen direlako arrisku faktore nagusitzat. Neurri orokor nagusia hamar pertsona baino gehiago elkartzeko debekua da, espazio itxi guztietan bezala baita kalean eta espazio irekietan ere. Beilategi eta hiletean, espazio itxi zein irekietan, gehienezko pertsona kopurura 30ekoa izango da. Igerilekuen edukiera %60ra mugatu da, eta gehienez hiru orduz egon ahal izango da.

Ostalaritza, garraioa, zahar etxeak...

Ostalaritzan murrizketa berriak ezarri dira. Nafarroan bezala, Espainiako Osasun Ministerioak agindutako neurriak ezarriko dira EAEn. Jatetxe eta tabernek 01:00etan itxi beharko dute, eta gauerditik aurrera ezin izango dute bezero berririk hartu. Jatetxeen gehienezko edukiera 60ra mugatu dute. Eserita soilik kontsumitu daiteke, barran izanik ere, eta pertsonen arteko gutxieneko distantzia metro eta erdian ezarri dute. Distantzia hori mahaien artekoa zen orain arte, orain mahai ezberdinetako pertsonen artekoa ere izango da. Diskotekak eta gaueko tabernak itxita mantenduko dira, eta gazte lokalak erabiltzea debekatu du batzordeak. Kalean erretzea ere debekatuta dago, bi metroko distantzia bermatu ezin denean. Ordutegien murrizketak garraio publikoari ere eragiten dio. Beranduenez 01:30ak arte ariko da.

Zahar etxeetako egoiliarrek pertsona bakarraren bisita jaso ahal izango dute, egunero ordu betez (bizitzaren “azken fasean” fasean dauden egoiliarren kasuan murrizketa arinagoa izan daiteke). Aldundiek eta Osasun Sailak murrizketak areagotzeko aukera zabalik utzi du Tapiak. Bestetik, egoiliar zein langile berriei PCR probak egingo zaizkie zahar etxean sartu baino hiru egun lehenago behintzat.

Hezkuntza ikasturtea

Agerraldian jarduneko Hezkuntza sailburu Uriartek ere hartu du hitza, astear den ikasturteaz hitz egiteko. Eskola guztiek egoera ezberdinak aurreikusten dituen kontingentzia plan bat osatu beharko dutela azaldu du. Jaurlaritzak hiru agertoki posible aurreikusi ditu hezkuntzari begira, baina Uriartek adierazi du apustua aurrez-aurreko hezkuntzaren aldekoa dela, eta aukeratu beharra izatekotan haur hezkuntza, lehen hezkuntza eta ikasle zaurgarriak lehenetsiko direla.

“Kontziente gara irakasle gehiagoren eskari orokor bat dagoela”, esan du Uriartek, baina ez du zehaztu bere sailak horrelakorik egingo duen –aste honetan bertan Steilas sindikatuak 6.000 irakasle eskatu ditu, “hezkuntza eta osasun eskubideak bermatzeko”–. Eskola bakoitzaren azterketa partikularra egingo dela eta erabakiak ere banakakoak izango direla azaldu du Uriartek, oro har ratioak gehienezko mugaren azpitik daudela azpimarratuz. egoera banaka aztertuko kdela eta horren arabera hartuko direleskola bakoitzaren egoera banaka aztertuko dela

Haur eta lehen hezkuntzan talde iraunkorrak osatuko dira ikasle zein irakasleekin eta sarrerak eta irteerak mailakatu egingo dira denboran. Zentro bakoitzak COVID-19aren alorrerako arduradun nagusi bat izendatuko du.

Indarrean, asteazken edo ostegunean

Kazetariei galderei erantzunez, Tapiak adierazi du neurriak bihar edo etzi jarriko direla indarrean. Neurriak mantendu, arindu edo zurruntzeko erabakia, aldiz, LABI batzordearen asteroko bileretan erabakiko da, kutsaduraren bilakaeraren arabera.


Kanal honetatik interesatuko zaizu: Covid-19 shockean adi
Hamar milioi euroko komisioak sortu zituzten Koldo García atxilotu duten maskaren operazioan

Guardia Zibilaren esanetan, Victor de Aldama enpresariak ordaindutako diru kopurua litzateke hamar milioi euroko hori, eta Espainiako Garraio Ministerioak pandemia garaian egindako salerosketei lotuta legoke. Ostegun honetan utzi dute aske García, epailearen aurrean... [+]


2022-03-29 | ARGIA
COVID-19aren aurkako pilulak iritsi dira Hego Euskal Herrira

Hego Euskal Herrira pilulaz betetako 722 kaxatxo iritsi dira, COVID-19a larri pasatzeko arrisku handiko gaixoentzat zuzenduta. Europar Patasunak COVID-19arentzako ahotik hartzeko gomendatu duen lehen pilula antibirikoa da Pfizerren Paxlovid eta Espainiako Gobernuak 253 milioi... [+]


2022-03-15 | ARGIA
Indarkeria matxista pandemian: erailketa gutxiago eta suizidio gehiago

Pandemiaren eragina indarkeria matxistan azterketa kaleratu berri du Espainiako Gobernuak. Bertan ondorioztatu dute eraildako emakume kopurua gutxitu egin dela, hauek kontrolatuta eduki dituzten denbora gehitu izanaren ondorioz. Baina emakumeen suizidioak gizonenak baino gehiago... [+]


2022-02-22 | ARGIA
Hipra txerto katalana merkaturatzear denean, patenteak kentzeko eskatu dute hogei erakundek

Merkatura ateratzear den Hipra txertoari patenteak kendu diezazkiola eskatu diote hogei erakundek Espainiako Gobernuari. Izan ere, Kataluniako multinazional honek COVID-19aren aurkako txertoa egiteko entsegu klinikoetarako diru publikotik gutxienez 15 milioi euro jaso ditu.


Hemen dator Gorillas, kalea hiltzeko makina berria: zuk eskatu eta 15 minutu barru etxean bertan jasoko duzu

Amazon ondoren Glovo, Deliveroo eta Uber Eats-ek gure hiri eta auzoetako bizimodua hankaz gora jarri dutela uste baduzu, adi hurrengo uhinari: heldu dira Cajoo, Flink, Dija, Gorillas, PicNic , Everli... COVID-19 betean sortuta, tximista bezala zabaltzen ari diren banaketako... [+]


Eguneraketa berriak daude