ARGIA.eus

Itzulpen automatikoa / Machine translation

Hamaika urte eta gero, Remi Ayestaran gogoan izan dute Amasa-Villabonan

  • Hamaika urte eta gero, ostiralean Remi Ayestaran gogoan izan zuten, Amasa-Villabonan. Omenaldia egin zioten Remi Gogoan Ekimeneko kideek.


2020ko abuztuaren 03an - 13:26
Argazkia: Eneritz Maiz Etxarri

"Remik merezi zuen, eta horregatik gaude, hamaika urte eta gero, beste behin ere hemen" esanez hasi zuten omenaldia Remi Gogoan ekimeneko kideek, ostiralean, Villabonako Errebote plazan.

Egoera berezia izanagatik eskerrak eman zizkieten omenaldira gerturatu ziren guztiei. "Urte arraroa eta gogorra doa, baina gaur ere, hemen egon beharra geneukan, Remirengatik", azpimarratu zuten. Hamaika urte pasa diren arren, "ez dugu ahaztu nahi 2009ko uztailaren 31an gertatu zena. Denborak zauriak sendatzen dituela esaten den arren, guri oraindik ez zaigu zauria itxi eta mina ematen digu", adierazi zuten. "Batzuk ezer gertatu ez bazen bezala" jarraitzen dutela nabarmendu zuten, "baina hori ez da bidezkoa" zioten. "Azalpenak zor zaizkigu, eta egun hartako arduradunek, bakoitzak bere erantzukizunak hartu behar dituzte", argi adierazi zuten ekimeneko kideek. Eta "horrela bakarrik egingo dugu aurrera egia, justizia, errekonozimendua eta erreparazioa lortzeko bidean. Remik, herri honetako beste biktimek bezala aitortza merezi du. Bortizkeria politikoaren biktima izan zela aitortzea. Remi ez zelako berez hil bihotzekoak jota".

Ostiralean bezala, San Inazio eguna, hileko azken ostirala zen duela hamaika urte ere. "Presoen eskubideen alde bilkura deituta zegoen. Baina uda hartako presio politikoagatik eta mediatikoagatik Espainiako epaileek debekatu egin zuten". Azkenean bertan behera gelditu zen deialdia, baina "batzuei ez zitzaien nahikoa iruditu", azaldu zuten, eta "liskar bila etorri ziren festa gunera". "Denok izan ginen beltzez jantzitakoen presio polizialaren lekuko", ekarri zuten gogora. "Egoera horren aurrean, Remi, herri ordezkari gisa jaiak bakean buka zitezen ahaleginean aritu zen, baina alferrik, ez zioten utzi. Bihotza leherrarazi zioten", kontatu zuten. Horregatik, "justizia eskatzen dugu, eta gertatu zena argitzea nahi dugu", eskatu zuten.

Mikel Ayestaran anaiak hitz egin zuen familiaren izenean, guztiei eskerrak emanez,  garbi hitz egin zuen: "Hamaikagarrenez, erantzuleen izenak eskatzen ditugu. Egia jakiteko eskubidea aldarrikatzen dugu. Memoria eta justizia eskatzeak lehentasun izaten jarraitzen du herri honen eraikuntzan". Eta hamaika urte geroago, oraindik ere, azken ostiraletan elkartzen jarraitzen dutela azpimarratu zuen herrian dituzten presoen eskubideengatik. Herriaren babesa aipatu zuen, "herriak bakarrik salbatuko baitu herria". "Herriaren babesa ezinbestekoa baita egoera krudel hau neurri batean arintzeko".

Gau hartan, Esne Beltza taldeak kontzertua ematekoa zuela ere aipatu zuten, baina, noski, bertan behera gelditu zen. Ostiralean, ordea, Esne Beltzako kideek taula gainean egon nahi izan zuten bi abesti eskainiz. Dantzariak eta bertsolariak ere izan ziren, eta Remi Gogoan Ekimenekoek eskerrak eman zizkieten guztiei, musu-truk omenaldian parte hartzeagatik, eta omenaldia egitea posible egiteagatik.

Behin Errebote plazako ekitaldia amaituta, eta txandak errespetatuz, Remi Ayestaranen oroitarrirainoko bidea egin zuten krabelinak eskuan hartuta. Guztiak distantziak errespetatuz kokatu ostean, Eusko Gudariak abestuz amaitu zuten Remiri eginiko omenaldia.


Kanal honetatik interesatuko zaizu: Oroimen historikoa
2024-03-01 | Euskal Irratiak
Gabi Mouesca: "Didier Laffiten etsenpluak erakusten digu lorpenak erdiesteko borrokan sartu behar dela"

Duela 40 urte hil zuen frantses poliziak Didier Lafitte Baionan. Donibane Lohizuneko arrantzalea tiroz hil zuten, Iparretarrak taldeko Gabi Mouesca autoz hitzordu batera eramaten zuela. Gertakari horren ondoren, Mouesca hamar urteko presondegi zigorrera kondenatua izan zen, eta... [+]


Sekretu Ofizialen Legea aldatzeko bideari ekin diote berriz ere Espainiako Kongresuan

Egungo Espainiako Gobernua osatzea ahalbidetu zuten alderdi gehienek onartu dute EAJk hirugarrenez aurkezturiko proposamena Espainiako Kongresuan, baina zalantzak daude hemendik aurrera PSOEk hartuko duen jarreraren inguruan, beste aldietan sozialistek ez baitute urrats gehiago... [+]


Nerea Martínez, Martxoak 3 elkarteko kidea:
"Instituzioak asko okertuko dira Martxoak 3 elkartearen eta Memoria Gararen gainetik pasatzen saiatzen badira"

Otsaila hilabete garrantzitsua izan da Gasteizko Martxoak 3aren Memoriaguneari begira. Hiru urteko prozesuaren ondoren, hilaren 14ean sinatu zuen Martxoak 3 elkarteak hitzarmena Gogora institutuarekin. Egun bat beranduago, Martxoak 3 Memoriagunea fundazioaren sorrera argazkia... [+]


Missak Manouchianen lorratza
Euskal partisano komunistak nazien kontra

Otsailaren 21ean Missak Manouchian eta Melinée Assadourian senar-emazte armeniarren gorpuzkiak Pariseko Panteoian sartuko dituzte ohore guztiekin. Poeta eta partisano komunista, Manouchianek ekintza ikusgarriak gidatu zituen Bigarren Mundu Gerran okupaturiko Frantzian,... [+]


Astebeteko omenaldia, Didier Lafitte hil zutela 40 urte beteko direla oroitzeko

Martxoaren 1ean, Didier Lafitte Iparretarrakeko (IK) kidea hil zutenetik 40 urte igaroko dira. 22 urteko gazteari Frantziako Poliziak tiroz kendu zion bizia. Urtemugaren testuinguruan, omenaldi ekitaldiak antolatu dituzte otsailaren 26an hasita.


Eguneraketa berriak daude