Haien bailara eta herrietan (Esteribar, Erroibar, Ezkabarte, Anue, Olaibar, Txulapain, Berriobeiti, Orkoien eta Oltza Zendea) eraiki nahi diren poligono eoliko handien aurka diharduen koordinadorak azaldu duenez, Sacyr-ek aurkeztutako Nafarroa 1, Nafarroa 2 eta Nafarroa 4 proiektuak bakarra dira, eta ez hiru.

Hiruen artean 29 aerosorgailu batzen dituzte eta 141,7 megawatteko potentzia: “Hiru proiektuak elkarren ondoan eta jarraian daude kokatuta, eta titulartasuna, ebakuazio-linea eta azpiestazio elektrikoa partekatzen dituzte. Hiru proiektutan banatzea ez da irizpide teknikoen ondorioz egin, baizik eta tramitazioaren unean estatuaren esku-hartzea saihestearren, izan ere, 50 megawatt baino potentzia handiagoa duten proiektuak ministerioan tramitatu behar dira, eta ez autonomia erkidegoan”.

Ministerioari eskatu diote berehala eten ditzala Nafarroako Gobernuaren aurrean egiten ari diren administrazio-prozedurak, hauek tramitatzeko eta ebazteko eskumen materiala eta ingurumeneko eskumena nork duen argitu arte. Salaketa honen kopia bat Nafarroako Gobernuari ere aurkeztu diote, jakinaren gainean egon dadin: “Ministerioaren jokaeraren zain gaude, eta jakin badakigu Nafarroako Foru Administrazioari materiala igortzeko eskatu diola”.

Herritarren parte-hartzea bermatu

Horrez gain, Nafarroako Gobernuko Industria Antolamendu, Energia Azpiegitura eta Meategien Zerbitzuari eskatu dio jendaurreko informaziorako emandako 30 eguneko epea luzatzeko.

Koordinadoraren esanetan, hiru arrazoirengatik ezinezkoa da emandako epean proiektuen aurkako alegazioak aurkeztu ahal izatea: lehenik, jendaurrean jarritako dokumentazioaren konplexutasuna eta luzeragatik, azterlan espezializatua eta profesionala eskatzen duten dokumentu, plano eta elementu tekniko ditu eta.

Bigarrenik, proiektua hirutan zatituta egoteak hirukoiztu egiten duelako dokumentazioa aztertzea eta, ondorioz, alegazioak aurkeztea ere zailtzen duelako. Hirugarrenik, jendaurrean abuztuan eta irailean jartzeak, oporraldian hain zuzen, ez du laguntzen kontaktuak errazten, profesionalei txostenak eskatzen edota dokumentazioa aurkezten.

Diotenez, epe labur honekin parte hartzeko eskubideari kalte egiten zaio, “eta hausten da, herritarrek beren interesak eta eskariak adierazteko duten aukera indibiduala zein kolektiboa, administrazioaren erabakietan eragiteko”.

Haize Berriak-en esanetan, udalek (Esteribar, Erroibar), kontzejuek (Enderitz, Otsakain, Orrio, Zildotz) elkarteek (Salvemos Eguesibar, Urbi auzo elkartea) eta hainbat pertsonak ere epeak luzatzea eskatu dute.