Abenduaren 1aren bezperetan egin dute aurkezpena, egun horretan ospatzen baita GIB / Hiesaren Nazioarteko Eguna. Elkarlanaren emaitzetako bat da Detektaezina=Transmitiezina kanpaina. Kanpainaren bultzatzaileek adierazi dutenez, gaur egungo analisi metodoen aurrean detektaezina bihurtu da, GIB birusa gorputzean dago baina ez du jarduera biralik. Detektaezina izateak infekzioa kontrolatzea ahalbidetzen du. Tratamendu eraginkor baten pean dauden pertsonek ezin dute birusa transmititu. Sexu harremanak preserbatiborik gabe izateak ez du arriskurik.

Bizkaisida, Euskaltzaindia eta Eusko Jaurlaritzaren elkarlanaren beste emaitza euskarazko hiztegia da. GIBaren inguruan gizarteak izan duen eta duen beldurra, estigma eta tabuaren ondorioz hizkera ere halakoxea da. Euskarazko terminologia sortaren bidez konnotazio horiek baztertu nahi dira. Hona kanpainaren bultzatzaileek osatutako hiztegitxoaren adibide batzuk:

Baztertzekoa: GIB gaitza / gaixotasuna, transmisio sexualeko gaixotasuna

Erabiltzekoa: GIB infekzioa, sexu-transmisiozko infekzioa

Baztertzekoa: GIBaren kutsadura

Erabiltzekoa: GIBa transmititzea

Baztertzekoa: Kolektibo arriskutsuak, jarrera arriskutsuak

Erabiltzekoa: Arriskuzko praktikak, GIBdun izateko arrisku egoeran dauden pertsonak