Duela 35 urte desagertu zen Popo Larre jendarmeekiko tiroketa batean

  • Gaur bezalako egun batez duela 35 urte, 1983ko abuztuaren 7an, desgertu zen Jean-Louis Larre, Popo ezizenez ezaguna, Landetako Leon herrian Frantziako poliziarekin izandako tiroketa baten ostean eta inoiz ez da haren berri gehiago izan. Haren adiskide eta burkideek uste dute poliziak atxilotu eta hil ondoren desagerrarazi egin zutela.

ARGIA @argia
2018ko abuztuaren 07a

Popo Larrek (1962an Nafarroa Behereko Heletan sortua) elektronika ikasketak egin, lanean hasi eta Heletan gurasoekin bizi zen. Gaztetik kirol, dantza eta antzerki taldeetan jardun zuen, Baigorriko Arrola taldean eta gero Xirristi Mirristi taldean. AEKn euskarazko eskolak ematen ere ibili zen. Herri Taldeetan hasi zen politikan militatzen.

1983ko abuztuaren lehen egunetan Iparretarrak erakundeak hainbat ekintza burutu zituen turismo egituraren aurka. Horien harira Poliziak atxiloketa batzuk egin zituen. Ihes egindako beste zenbait ekintzaile Landetako Leon herriko kanpalekuan babestu ziren eta poliziak haien berri jakin zuen arduradunek ohartarazita. Jerndarmeen eta militante euskaldunen artean tiroka hasita, Yves Guimmarra jendarmea hilik gertatu zen eta beste bat arin zaurituta gelditu ziren.

Horren ondorengoa Filipe Bidartek kontatua du: "Tiroketa hasi baino lehen, dudazko memento bat izan zen, militanteak eta jendarmeak parean gertatu zirelarik. Dudazko memento hartan, Popok ihes egin zuen, konsigna zen bezala. Landetako oihanean barna sartu zen. Gero, jendarmeek tiroketa hasi zuten eta militanteek ihardetsi zuten. Baina arte horretan, Popo desagertu zen. Tiroketaren ondotik, jendarmeei armak kendu ondoan, militanteek ihes egin zuten. Orduan ziren ohartu Popo ez zela han. Entseatu ziren aurkitzen, baina ez zuten atzeman, beraz beren bidetik segitu zuten, ez baitzuten han gelditu behar".

IKk geroago publikoki salatu zuen bere ikerketen arabera poliziek atxilotu eta hil zutela Popo Larre militantea. Aldiz, jendarmeek hainbat bertsio ezberdin zabaldu zituzten, Ameriketara ihesi joana zela tartean. 2000. urtean tiroketaz Parisen egindako epaitegian ez zen argirik azaldu. Ordukoa da Mikel Asurmendik ARGIAn plazaratutako kronika hau: "Leongo tiroketaren auzia edo lau militanteen ohorea".

Aldiz, handik gutxira Poporen desagerketa nahastu zen beste desagerketa bitxi batekin: inguruko hondartza batean itota hil zen Pascal Dumont 15 urteko gaztea jendarmeek lurperatzera eraman zutenean Carbon-Blanc herriko hilerrira, haren gorpua ikusita gurasoek ukatu egin zuten hura izan zitekeenik beren semea, hilotza adin handiagoko gazte batena izaki. Carbon-Blancen ehortzia Popo Larreren hilotza izan ziteela eta miaketak egin behar zirenean, ikerlariei aurrea hartu zieten ezezagunek, hilobia arakatu eta hezurrak ebatsiz.

35 urte geroago, Iparraldeko militanteek mila bider galdetu duten arren "Nun da Popo?", egirik ez da azaldu. Euskal Memoria fundazioak oroitarazi du gaurko efemeridea.

 

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!

Kanal hauetan artxibatua: Oroimen historikoa  |  Iparretarrak

Oroimen historikoa kanaletik interesatuko zaizu...
Azkenak
EGILEA
Eguneraketa berriak daude