ARGIA.eus

2020ko uztailaren 09a

Gasteizko Udalak kale gorrian utzi zuen hiru adingabedun familiaren kasua salatu dute hiriko eragile sozialek

  • Hiriko arduradun politikoak eta gizarte politikak salatu dituzte. Familiak pairatutakoa egoera orokorrago baten “adibide” dela ziurtatu dute. Antzeko bidegabekeriak pairatzen dituzten herritarrei dei egin diete salatzera eta erantzun komunitarioen beharra azpimarratu dute.

Z. Oleaga @zoleaga1
2020ko ekainaren 02a
Gasteizko Alde Zaharrean egin dute prentsaurrekoa. Argazkia: DosporDos.

Agerraldia Alde Zaharreko Gasteiz Txiki auzo elkarteak eta Auzoan Bizik egin dute, CEARen, Eskubide Sozialen Plataformaren, Talkaren eta Kale Gorrian Inor Ez taldeen babesarekin. ARGIAk maiatzaren 10ean jakinarazi zuen familiaren kasua salatu dute eragileek. Gogoratu dute bikotea eta hiru adingabeak konfinamendua gela bakarrean ari zirela pasatzen, eta gelatik kanporatuak izan zirenean gizarte zerbitzuek eskaini zieten bakarra estatuko hiri batera autobus txartela ordaintzea izan zela. Familiak Olarizuko etxeetan okupatu zuen argirik eta urik gabeko etxebizitza bat, eta poliziaren “presio jarraitua” pairatu du ordutik.

Hainbat galdera egin dituzte Auzoan Biziko Amelia Barquinek eta Gasteiz Txikiko Manu Arakamak: “Nola liteke ez udala ezta gainontzeko administrazio publikoak ere gai ez izatea berehalako erantzun bat emateko? Nola liteke Udalak eta Eusko Jaurlaritzak dituzten ehunka etxebizitza hutsak, behar dituzten pertsona eta familientzat berehala ez eskaintzea?”. Salatu dute baita ere familia “elkartasunetik eta auzokideen elkarrekiko babesetik” lagundu dutenak, “errekonozimenduaren ordez”, poliziaren isunak jasotzea.

Gizarte zerbitzuen dei berria

Familiaren egoerak hobera egin dezake hurrengo egunetan. Prentsaurrekoan azaldu dutenez, ostiralean, “prentsaurreko honen deialdia publiko egin zelarik”, gizarte zerbitzuen deia jaso dute, “familiarentzako behin-behineko egoitza irtenbide bat” topatu dutela esanez. Barquinek eta Arakamak familiak bere eskubideak aldarrikatzeko eta egoera salatzeko izan duen “irmotasun eta erabakimen txalogarria” azpimarratu dute. Baina zaurgarritasun egoeran dauden beste familia asko “blokeatuta” edo “ezintasunean” daudela gogoratu eta haiengan ere jarri nahi izan dute fokua.

Egoera orokorrago baten isla konkretua

Familia bizitzen ari dena errealitate orokorrago baten “adibide” dela adierazi dute eragileek: “Gertatzen ari denaren egoera jakin eta oso esanguratsu bat azalduz, hiriko arduradun politikoen jokabidea salatu nahi dugu. Izan ere, Gasteizen oinarrizko gizarte-eskubideen urratze kasu larriak gertatzen ari dira”. Gizarte Politiken saileko arduradunak apirilaren 20an eginiko adierazpenak ekarri dituzte gogora: “Saihestu egin behar dugu edozein herritar abandonatuta edo laguntzarik gabe geratzea gizarte gaietan, etxebizitzarako sarbidean edo eskubideen babes kontuetan. Ez dugu inor atzean utziko”.

Errealitatea kontrakoa dela salatu dute Barquinek eta Arakamak: “Argi dago pertsona asko kanpoan uzten ari direla. Familia askoren egoera okertzen ari da pandemia eta larrialdi egoera honetan. Erakundeen erantzunak, arindu beharrean, egoera batzuk okertzen lagundu du”.

Salatzearen eta komunitatearen beharra

Bazterketa egoeran dauden pertsonei edo antzeko kasuak ezagutzen dituztenei dei egin diete Barquinek eta Arakamak, bai egoerak salatzera, bai eragileekin eta auzo sareekin harremanetan jartzera: "Salaketa horiek publiko egin behar dira, agintariek eta arduradunek behingoz bete dezaten dagokien betebehar sozial eta etikoa”. Datozen urteetan egoera sozioekonomikoak okerrera egingo duela aurreikusita, “elkar laguntzeko komunitate sareak” sortu eta daudenak indartzearen garrantzia azpimarratuz amaitu dute prentsaurrekoa.

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!

Kanal hauetan artxibatua: Covid-19 shockean adi  |  Bazterkeria

Covid-19 shockean adi kanaletik interesatuko zaizu...

Azkenak
EGILEA
Argia buletina
Egunaren laburpena
zure e-postan
Eguneraketa berriak daude