Galizian abstentzioa aurrekoetan bezalakoa, Nuñez Feijoo eta PPren gehiengo absolutua jokoan
Egunaren lehen erdian Galiziako autonomi hauteskundeetan protagonista nagusia parte-hartze handia izanen zela zirudien arren, hau da, duela lau urtekoetan baino ehuneko lau puntuz handiagoa, arratsalderako botoa emateko furia baretu dela zirudien igoera puntu bakarraren azpitik geratuz. Botoen kontaketak erakutsiko du ea Feijoo presidenteak mobizilizatu dituen bere boto emaileak gehiengoa galduz gero gobernurik ezin osatuko zuelako argudioarekin ala PSGko (PSOE) sozialistak eta Bloque Nacionalista Galegoko abertzale ezkerrekoak izan diren botoaren mobilizazioaren onuradunak.
Galizian ere irailerako behar zuten hauteskundeak aurreratuta, amaitu berri den hauteskundearen osteko boto kontaketak erabakiko du ea Alberto Nuñez Feijook PP eskuindarrarentzako eutsi dion gehiengo absolutuari, 12 urte luzez gobernuaren eta administrazioaren jaun eta jabe izan ostean. Aurretiaz egindako inkestek 42 jarlekurekin gehiengo hori lortuko dutela zioten arren, azken asteotako eta zehazki A Mariña eskualdean COVID-19 pandemiak egin duen agerraldi berriaz egin duen kudeaketak zer eragin eduki duen argituko du kontaketak.
Hautes-mahaiak itxi bezain fite zabaltzen diren inkestetan –errealitatean lehenagotik eginak daudenetan– bi emaitza oso kontrajarri lortu dituzte bi enpresak. GFK enpresak egindakoan PPk gehiengo absolutua galduko luke. Aldiz, GAD3 konpainiak gehiengo absulutu hori bai ematen dio bere kalkuluetan PPri. Hori bai, biek ere bigarren indartzat BNG aurreikusten dute PSG-PSOEren aurretik.
Oraingoz ziurtzat dakiguna da Galiziak dauzkan 3.952 hautes-mahaietan botoa emateko eskubidea zeukatela 2.697.315 herritarrek, baina hauetatik 463.163 atzerrian bizi direla, botoa emateko postaz egin beharra daukatelarik.
EAEn bezala Galizian ere COVID-19ak agerraldi nabarmen egin baitu azken asteotan, hemen ere polemika eta haserrea eragin ditu birusaz kutsatuta positibo eman duten herritarrei botoa emateko debekua agindu izana gobernutik. Feijooren gobernutik, gaixo horiei boto eskubidea bermatzeko aurreikuspenik egin ez eta horien kopuruari garrantzia kendu diote: "Gaixo kopuru oso handia ez da, ez dira 300era iristen" esan du Alfonso Rueda Xuntako lehendakariordeak.
Nuñez Feijook 13. urtez Xuntako lehendakari izaten jarraituko duen ala ez baldin bada Galiziako hauteskundeetan jokatzen den gai nagusia, ezkerreko indar harremanetan aldaketarik gertatzen den jakiteko irrikaz ere badago jendea. PP kontserbadorearen ostean ia beti PSG-PSOE ezagutu den arren, azken urteotan BNG ezkertiar abertzalea indarra hartzen etorri da Ana Ponton lider gaztearen gidaritzapean eta gaur erabakia izango da batetik ea bien artean PPri gobernua kentzeko gai diren eta bestetik ea BNGk harrapatu edo are gainditu ere egin ote duen PSGren indarra Galiziako legebiltzarrean.
Urte bat bestearen ondotik, 87 urte joan dira astelehen lazgarri hartatik, apirilaren 26 hartatik; azoka eguna Gernikan, heriotza eguna. Suzko eta berunezko egunak eta urteak ondoren. Hildako ugariren gainean porlana eta isiltasuna. Porrota eta sufrikarioa. Nortasun debekatua,... [+]
