G7aren bilerak kaltetutako 412 negoziori kalte-ordainak emango dizkie Frantziako Estatuak

  • Pirinio Atlantikoen Prefeturak asteartean jakinarazi du zenbateko kalte-ordainak emango dituen abuztuan Biarritzen egin zen G7aren bilerak Lapurdiko merkatariei eragindako kalteengatik. 584 kalte-ordain eskaera egin ziren eta horietatik 412 onartu dituzte, gehienak Baiona, Angelu eta Biarritz hiriguneko negozioenak.

ARGIA @argia
2019ko urriaren 23a
G7aren aurkako mobilizazio bat aurtengo abuztuan (argazkia: Dani Blanco).

Departamenduko Prefeturak prentsa-ohar baten bidez eman du ezagutzera Lapurdiko merkatariei G7ko goi-bileran ezarritako segurtasun-neurrien ondorioz sortutako galerak arintzeko abian jarritako kalte-ordainen prozesuaren emaitza.

Guztira, Estatuko instantzia horrek 584 laguntza-eskari bideratu zituen, horietatik %59 Biarritzeko establezimenduetan, %22,5 Baionan eta %10 Angelun.

Kexak ere jaso ziren, neurri txikiagoan bada ere, Hendaiatik (guztizkoaren %3,5), Bidartetik (%2) edo Urruñatik (%1,5).

Munduko zazpi estaturik boteretsuenetako buruzagiek Lapurdin zuten presentziaren ondorioz, segurtasun neurri oso handiak hartu ziren eta haien eragina Biarritzetik harago iritsi zen, Lapurdiko kostalde osoa hartuz, baita Gipuzkoan ere.

Hasiera batean 300.000 euro baino gehixeago jarri zituen estatuak galera horiek konpentsatzeko, baina azkenean, 1.161.000 euro banatuko ditu. Prefeturaren arabera, zenbateko hori enpresa txikien artean banatuko da gehienbat, eskatzaileen %80k 500.000 eurotik beherako urteko negozio-zifra deklaratu baitu.

Onuradunek datozen egunetan jasoko dute laguntzaren zenbatekoa jasotzen duen jakinarazpena eta azaroaren hasieran hasi beharko lukete jasotzen.

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!

Kanal hauetan artxibatua: G7  |  Baiona  |  Biarritz  |  Angelu

G7 kanaletik interesatuko zaizu...
Eguneraketa berriak daude