Frantziako Immigrazio Legea: osasun arreta hari batetik zintzilik

  • Azkenean, ez dute indargabetu egoera irregularrean dauden herritarrek baliatzen duten Estatuko laguntza medikoa. 2024an erreformatzeko asmoa du, ordea, eskuinak. Hala egiten badute, milaka sendagilek aurreratu dute erabakia desobedituko dutela.


2023ko abenduaren 22an - 13:55

Aurélien Rousseau Frantziako Osasun ministroak abenduaren 20an dimisioa aurkeztu zuen. Frantziako Asanblea Nazionalak Immigrazio Lege berria onartu zuen abenduaren 19an. Rousseau ministroak haren desadostasuna agertua zuen legearen edukiari zegokionez. Hurrengo egunean utzi zuen kargua.

Rousseau, batez ere, egoera irregularrean dauden atzerritarrei osasun-laguntza ematen dien Estatuko laguntza medikoa (AME l’aide médicale d’Etat ) indargabetzearen aurka agertu zen. Azkenean, abenduaren 19ko bozketan, laguntza bertan behera ez uztea erabaki zen. Asmoa zen Estatuko laguntza medikoa ezabatu eta larrialdietarako laguntza abiatzea. Dena den, exekutiboak adierazi duenez, 2024an egingo dute erreforma eta orain arteko Estatuko laguntza medikoa desagertuko da.

Estatuko laguntza medikoa 2000. urtean jarri zen indarrean. Egoera irregularrean dauden atzerritarrei laguntza medikoa eta ospitaleetan artatzeko aukera ematen die. Zainketen %100 jasotzeko eskubidea dute, gastuak aldez aurretik ordaintzetik salbuetsita, beti ere Gizarte Segurantzaren tarifaren mugaren barruan.

Larrialdietarako laguntza medikoa indarrean jarriko balitz, osasun arreta murritzagoa litzateke. Laguntza sistema horren oinarria hau litzateke: gaixotasun larri eta min akutuen tratamendua, profilaxia, haurdunaldiarekin lotutako arreta, txertoak eta prebentzio-medikuntzarako azterketak. Frantziako eskuinak aspalditik nahi du halako erreforma bat egin. Gaur egun dagoen osasun-arta sistemaren ondorioz, atzerritik jendea Frantziara osasun zerbitzuak baliatzera joaten dela azpimarratzen dute.

3.500 sendagileren mehatxua

Azaroan 3.500 medikuk adierazpen bat sinatu zuten. Desobeditzeko asmoa zuten, baldin eta paperik gabeko pazienteak beren beharren arabera doan artatzen jarraitzea ez bazuen bermatzen estatuak. Alegia, orain arteko arta sistema kendu eta larrialdietarakoa onartuko balute, gaixoak artatzen jarraituko zuketen. Proposatutako neurria astakeria etiko, sanitario eta finantzariotzat jo dute.

Dimititu berri duen Rousseau ministroak berak esana zuen egoera irregularrean dauden herritarrei lehen arreta ukatuz gero ospitaleak jendez beteko liratekeela. Adierazpena sinatu duten medikuek adierazi dute haien ateak “zabalik izango direla bertakoentzat eta kanpokoentzat”.


Kanal honetatik interesatuko zaizu: Migrazioa
Migratzaileei sarrera gogortzeko ituna onartu du Europako Parlamentuak

Europar Batasunean migrazio politika gogorragoa ezartzeko ituna onartu du euroganberak, zortzi urtetako negoziazioen ondoren. Hala, eskuin-muturraren ideiei men egin eta arau baztertzaileak erabili ahal izango dituzte hemendik aurrera herrialdeek, kontrola areagotzeko eta... [+]


Pertsona migratuentzako ekintzailetza kooperatiboa, bizi-proiektuak hobetzeko tresna bat

Hegoaldetik ekimena pertsona migratuei ekonomia sozial eraldatzailea hurbiltzeko jaio zen 2023ko ekainean, Enarak kooperatiba, OlatuKoop eta Lankiren eskutik. Geroztik ari da bidea egiten, formazio saioak eskaini nahi ditu eta Katalunian izandako esperientziak konpartitu... [+]


2024-04-10 | ARGIA
Migratzaileei laguntzeagatik gutxienez 117 pertsona auzitara eraman dituzte Europan 2023an

Pertsona migratzaileak laguntzea kriminalizatzen duten politikak nagusi dira Europar Batasunean, eta hori egiteagatik auzitara eraman dituzten pertsonen kopuruak errekor berria ezarri du 2023an: gutxienez 117.


Polizia operazio "arrazista" Donostian: 29 lagun eraman ditu Poliziak identifikatzeko

Ostegun goizeko 8:00etatik 12:20era Polizia operazio handia egon da Donostiako Martutene auzoko etxe okupatu batean. Espainiako Poliziak, Ertzaintzak eta Udaltzaingoak elkarrekin egin dute operazioa, “atzerritarren bulegoaren operazioa” dela azaldu dute. Donostiako... [+]


Eguneraketa berriak daude