Frantziak kanaken autodeterminazio eskubidea zangopilatu duen urtea izan da 2021a
COVID-19ak eragindako osasun egoeragatik independentziari buruzko erreferenduma atzeratzea galdetzen zuten independentistek, hori gabe boikotatuko zutela abisatuz. Eskaerari elkor, hitzordu politikoa burutu zuen Frantziak abenduaren 12an. %96,49ak Frantziaren mende gelditzearen alde egin du, abstentzioa %56,1 izan delarik. Pariseren kolonialismoa salatu dute bertatik zein nazioartetik autodeterminazio eskubidearen aldeko askok.
Abenduaren 12an burutu zuten Kanakyn edo kolonoek jarritako izenari segi, Kaledonia-Berrian 1998ko Noumeako Akordioek finkatu independentziari buruzko azken erreferenduma. Alta, horrelakorik ez zuten nahi kanakek, COVID-19 izurriteak baldintza egokiak ez zituelako bermatzen. Hitzordu politikoa atzeratzea galdetu arren, mantentzeko hautua egin zuen Frantziako Gobernuak. Alta, abisua emana zuten: egingo balitz, erreferenduma boikotatuko zuten. Gertatu beharra gertatu da: independentistak etxean geratu dira, %56,1eko abstentzioa ondorioztatuz, eta independentziaren kontrako botoak %96,49 jaso du. Alderdi independentista guztiek zuten bozkatzera ez joarteko deia luzaturik.
Noumeako Akordioan adosturikoa zangopilatua izan dela deituratu dute kanakek. Estatuko Kontseiluaren aitzinean helegitea jarri du Palika eragile independentistak.
Besteak beste, Kaledonia-Berriko Kongresuko presidente Roch Wamytanek deitoratu ditu emaitzak: "Hasierako puntura itzuli gara. Guretzat ez da hirugarren erreferenduma. Gure ustez, zilegitasun juridiko eta politikoari dagokionez, bi erreferendum besterik ez daude: 2018koa eta 2020koa. Hau Frantziako Estatuaren eta honen aldekoen erreferenduma da, ez gurea". Emmanuel Macron presidenteak haatik ondokoa plazaratu zuen bozketa egunean: "Gau honetan Frantzia ederragoa da, Kaledonia-Berriak bere baitan gelditzea erabaki duelako.
Pariseren inposaketa postura ikusirik, elkarrizketa eten dute eragile independentistek eta jakinarazi dute ez dutela Parisek finkatu ondoko hitzordu politikoetan parte hartuko.
Independentziaren aldeko botoa, %47,7tik %3,51ra
Emaitza honek ez du errealitatea islatzen. Hain zuzen, aurretik egindako bi erreferendumei alderatuz emaitzek ez dute batere zentzu bera. Urtez urte, independentziaren aldeko botoak gora egin du: 2018ko arazoaren 4an egin zen lehena eta %43,33 lortu zuen baiezkoak, 18.500 botoren aldearekin. Iaz buruturiko bigarrenean %47,7ek egin zuten baietzaren alde.
Bi urtez 3,4 puntu igo zen baietzaren aldeko bota eta 9.950koa izan zen bien arteko aldea. Aldi honetan, baietzak botoen %3,51 eskuratu du (boto zuriak edo baliogabekoak %2,99).
1853an indarrez kolonizatuak izan ziren kanakak eta orduz geroztik, kolonia izatetik estatutu bereziko kolektibitate izatera pasa arren, Frantziaren barne izaten segitzen du Pazifikoko irla multzoak.
Independentziaren hirugarren erreferenduma abenduaren 12an egingo da Kanakyn, baina independentistek ez parte hartzea erabaki dute, pentsatzen baitute COVID-19agatik ez dagoela baldintza egokirik. Frantziako Estatuak, ordea, hitzorduari eutsi dio, unionisten onerako.
Aste bateko negoziazioen ondorioz finkatu dute agenda politikoa Kanakyko loialisten, independentisten eta Frantziako Gobernuko ordezkarien artean. Noumeako akordioei segi, independentziari buruzko hirugarren eta azken erreferenduma ukanen dute Kanaky edo... [+]
Noumeako Akordioetan (1998) aurreikusitako hirugarren erreferenduma 2022ko udazkenean egitea eskatu dute Kaledonia Berriko Asanblean gehiengoa duten alderdi independentistek.
Otsailaren 17 honetan bertako Kongresuko 54 hautetsiek erabaki dute osaketa berria: independentisten aldetik, UC-FLNKS eta UNI Independentziarako Batasun Nazionala taldeek hiruna aulki jaso dituzte, eta Frantziaren baitan egoteko gogoz dabiltzan L’Avenir en confiance... [+]
