Emakumeak borrokan

Felipe VI.a Espainiako erregeak 20.230 euroko soldata jasotzen du hilero

  • Espainiako Errege Etxeak bere webgunean publiko egin berri duenez, Borboi familia horretako kideek ia 680.000 euro poltsikoratu zituzten soldata gisa 2018an.

Juan Mari Arregi
2019ko maiatzaren 09a
Espainiako Kongresuan zintzilikatutako Felipe VI.aren erretratuagatik 88.000 euro ordaindu ditugu herritarrok.

Felipe VI.a Espainiako erregeak joan den urtean 242.769 euro irabazi zituen –hilero 20.230 euro–, bere emazteak aldiz, Letizia erreginak, 109.260 euro. Espainiar errege familiak orotara 679.818 euro poltsikoratu zituen 2018an soldata gisa, eta Errege Etxearen urteko aurrekontua 7,9 milioi eurokoa izan zen –horietatik 3,8 milioi euro pertsonaleko gasturako–. Baina errege familiatik aparteko goi karguek ere 100.000 euroko urteko sarrerak izan zituzten.

Hori guztia gutxi balitz, duela egun gutxi Espainiako Kongresuan zintzilikatutako Felipe VI.aren erretratuak 88.000 euro kosta ditu. Horiexek dira publiko egin berri diren datu ofizialak, denon zergetatik ordaindu beharrekoak.

Ez da egia dirua falta denik jendarteko sektore umilenen beharrak asetzeko, nahiz eta milioika pertsona egon 900 euroko gutxieneko soldata ere ez dutenak edo 634 euroko pentsio minimora iristen ez direnak. Joan den astean txoko honetan salatu dugu estatuek gastatzen dituztela milika milioi euro armetan. Orain badakigu Espainiako Estatuan zenbat gastatzen den monarkia anakronikoa mantentzeko.

Berdintasuna sustatzeko politika sozialik ez dago, eta politika antimilitarrik are gutxiago: aberastasuna ez da zuzen banatzen. Ez al da lotsagarria Felipe V.ak gure zergetatik 20.230 euro jasotzea hilean, gutxieneko soldata eta pentsio miserable horiek daudenean? Justua eta bidezkoa eta zentzuduna al da erregeek eta errege-ohiek antigoaleko 100 milioi pezeta eramatea urtero?

Gaur egun monarkia mantentzea, garaiz kanpokoa eta antidemokratikoa izateaz gain –ez baitugu guk aukeratu–, ekonomikoki ere kostu itzela dakar eta irain bat da herritarren gehiengoak dituen soldata eta pentsioekin alderatzen badugu. Bederenik, herritarrok erabaki beharko genuke hori horrela izatea nahi dugun ala ez.

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!


Desberdintasun soziala kanaletik interesatuko zaizu...
Azkenak
EGILEA
Eguneraketa berriak daude