Faxistek atzorako antolatu zuten immigrazioaren kontrako mobilizazio bat Torre Pachecon (Murtzia), baina manifestari gutxi bildu zen bertan, deitzaileek sare sozialetan egindako "aldarrikapen masiboetatik" urrun. Ehun bat lagun baino ez ziren bertaratu "segurtasun faltaren eta migratzaileen presentziaren aurkako" deialdira (zenbait bizilagun eta kanpotik joandako talde txiki batzuk), eta manifestariak baino polizia-agente gehiagok zaindu zuten protesta, Guardia Zibileko eta udaltzaingoko 130 bat kide izan baitziren. Hedabide ugaritako kazetariak kontuan hartuta, mobilizaziora batu zen jendea baino gehiago ziren poliziak eta prentsa.

40.000 biztanle inguru ditu herriak, eta tentsio handiko giroa bizi du duela egun batzuetatik. Izan ere, talde faxistek magrebtar gazteei egotzi diete 68 urteko bizilagun batek jasandako erasoa, "magrebtarren ehizari" bide eginez.

Deport Them Now (Deporta ditzagun Orain) bezalako Telegrameko kanalek bultzatu zuten lintxamendua, eta Espainiako Estatuko eskuin muturreko figura publiko eta influencer multzo oso batek areagotu zuen dei arrazista, Vox alderdiarekin lotura organikoak dituen jendea tartean. "Gure aitona-amonen aurkako erasoei ezetz esateko manifestazio" gisa deskribatuz, atzoko deialdia, Espainiako Gobernuaren Ordezkaritzari ofizialki jakinarazi ez zitzaiona, Telegram eta X bezalako plataformetan zabaldu zen batez ere.

Oraingoan, Poliziaren presentzia handiagoa izan zen faxistek gehien seinalatutako auzoetan eta manifestazioaren inguruan, eta komunikabideen arabera, horrek apaldu zuen mobilizazioa. Daniel Esteve, Desokupa enpresako burua, dozenaka lagunekin batera atzeman zuten udalerrira iritsi bezain laster, eta, lekukoen eta iturri ofizialen arabera, Guardia Zibilak herritik kanpora eskoltatu zuen, protestan aktiboki parte har ez zezan.

Hainbat istiluk, hala nola kazetariek jasandako jazarpenek, arratsaldea markatu zuten; eta informazio-talde batzuk joan egin behar izan ziren, irain eta mehatxu artean. Bertaratutako pertsona batzuek "emagaldua" ("zorra") eta "gorria" ("roja") oihukatu zioten Antena 3 kateko kazetari bati, adibidez. Beldurraren ondorioz, dozenaka denda itxita zeuden, eta etxean geratu ziren bizilagun ugari.

"Bakean bizi nahi dugu, beti bezala", errepikatzen dute bizilagunek eta komunitate magrebtarreko pertsonek komunikabideetan. Hala ere, kaltetu guztiak ez dira etxean geratu azken egunotan, Torre Pachecoko komunitate migratzaileko kide batzuek beren burua defendatzea erabaki baitute etengabeko mehatxuen aurrean, erasotzaile nazi batzuk zauritzera iritsiz.

Espainiako Gobernuaren Ordezkaritzak hainbat atxiloketa izan direla baieztatu du lintxamenduen eta istiluen ostean, eta sareetako eta mezularitza-kanaletako mezu arrazisten sustatzaileei buruzko ikerketak zabalik jarraitzen du. Poliziaren presentzia zalantzan jarri du askok, Torre Pachecon mobilizatutako hainbat faxistarekin bat egin duelako edo haiekiko pasibo mantendu delako; baina datozen egunetan ere indarrean jarraituko du presentzia poliziak horrek, deialdi faxista gehiago izango direla iragarri ondoren. Bitartean, izua da nagusi Torre Pachecoko eguneroko errutinan.