FARCetik FARCera

  • Gerrilla mugimendua izatetik alderdi politikoa izatera jauzia egin du FARCek, siglak mantenduta. Izena eta logoa adostu dituzte: Guztion Indar Alternatibo Iraultzailea.

Xalba Ramirez @xalbaram
2017ko irailaren 01a

Kolonbiako Indar Armatu Iraultzaileek izena aldatuta izana mantendu nahi dute. Armarik gabe “Kolonbiarentzat justizia sozialean oinarritutako bakea” lortzea dute helburu oraindik. Bake akordioak muturreraino eramateko konpromisoak berretsi dituzte irailaren 1ean bukatuko den kongresu eratzailean.

Momentu historikotzat jo dute unea, “demokrazia zabalena eta justizia soziala lortzeko garaia da”. Helburu nagusia konbergentzia handi bat sortzea dela adierazi dute, “kolonbiarrentzat ongi bizitzean oinarritutako bake bat lortzeko pertsona guztiak, mugimendu eta alderdi politiko aurrerakoiek izango dute lekua”.

Bake iraunkorra lortze bidean, Kolonbiako Gobernuaren eta FARCen artean sinatutako akordioari errespetua adierazi dute, lehentasun gisa paramilitarismoaren amaiera eskatu dute eta biktimentzat egia, erreparazio integrala eta ez errepikatzeko bermeak izatea. Trantsizio eta adiskidetze gobernu baten alde egingo dute.

Justizia sozialik gabe bakerik ez dela egongo ziurtatu dute eta “egitura ekonomiko injustuak” aldatzeko erreforma sorta zehatza aurkeztuko dute.

52 urteko borroka armatua amaitutzat, FARCek 2018ko hauteskunde presidentzialetan parte hartzeko asmoa du, herrialdeko mugimendu politikoekin aliantzetan sakonduz.

Euskal Herritik Sortuko Urko Aiartza eta Rufi Etxeberriak eta Ezker Anitzako Iñigo Martinezek kongresuan parte hartu dute alderdi berriari euren elkartasuna adierazteko.

 

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!

Kanal honetan artxibatua: FARC

FARC kanaletik interesatuko zaizu...
Azkenak
EGILEA
Eguneraketa berriak daude