“Euskaraz txikiago?”: Nafarroako turismo eskuliburua aldatzeko eskatu du Administrazioan Euskarazek
Nafarroako Gobernuaren Turismo eskuliburua “euskararen kontrako hizkuntza politika bati dagokio” Administrazioan Euskaraz Taldeak (AET) salatu duenez.
“Funtsean ez du aldaketarik izan”, AETren arabera. Besteak beste, euskararen aldeko taldeak nabarmendu du eskuliburuaren 40. orrialdean adierazten dela eremu ez-euskaldunean seinale turistikoak gaztelania hutsean izanen direla.
Eskuliburuak ematen dituen beste jarraibide batzuk ere deitoratu ditu taldeak, adibidez, eremu ez-euskaldunean turistari ongi etorria emateko paneletan euskarazko “Ongi etorri” hitzak gaztelaniazko “Bienvenidos” baino txikiago jarri behar izatea.
“Grafikoek erakusten dutenez, atzerriko hizkuntzekin batera multzokaturik agertuko dira eta ‘Reyno de Navarra’ gaztelania hutsean geldituko da”.
“Turismoko seinaleen eskuliburua goitik behera berrikusi eta aldatu behar da” AETren ustez.
