Kaleratuko dituzten langileen izenak gaur edo bihar emango dituzte ezagutzera.

2012ko abenduan erregulazio espedientea aplikatu zien Gamesak 300 langileri, eta beste 394ri aurtengo maiatzean, UGT sindikatuak jakinarazi duenez. Oraingo 52 kaleratzeak "banakakoak" dira; alegia, ez dira erregulazio espediente baten parte.

Pasa den azaroaren 7an, urtarrila eta iraila artean 31 milioi euroko irabaziak izan zituela iragarri zuen enpresak. Iaz tarte berean 67 milioi euroko galerak izan zituen.

"Lotsagarri eta iraingarria da, enpresak, irabaziak izan dituenean, sei milioi euro aurrezteko kaleratze hauek iragarri izana, asmoa duenean 2016-2017an zuzendaritzako kideen artean 18 milioi euroko plusa banatzeko", adierazi du enpresa batzordeko CCOOko ordezkari Patxi Pierolak. "Hipokresia handiaren isla da elkarrizketa-mahairako deitu gaituzten hilabete berean, 52 langike kaleratzea".

Langileek itxialdiak egin zituzten atzo Nafarroako eta Bizkaiko plantetan, eta datozen egunetan protesta gehiago deituko dituztela iragarri dute.