Aldizkako lan kontratua duten emakumeen kopurua gorantz doa; hots, maiatzetik hona kontratu horien %65,13 eten egin da Hego Euskal Herrian. LAB sindikatuak azpimarratu du lan kontratu horiek gorantz doazela Espainiako Estatuko lan erreforma indarrean jarri zenetik, eta gaur egun emakumeen artean nagusi dela.

Langabeen gehiengoa emakumea izateaz gain (%59) sindikatuak emakumeek lan kontratuetan jasan beharreko "prekarietatea" nabarmendu nahi izan du. "Azken hilabeteetan gertatu dena, uda tarteko egonik, emakumeen lan baldintzen prekarietatearen adierazle gordina da". Gizonezkoen artean, epe berean %29,23 eten dira aldizkako kontratuak.

Langabezia gora abuztuan

Abuztuan ere gora egin du langabeziak Hego Euskal Herrian, bigarren hilabetez jarraian. Lanbideren eta Nafar Lansareren datuen arabera, abuztuan uztailean baino 2.496 langabe gehiago daude. Batez ere Bizkaian eta Gipuzkoan handitu da kopurua (1.005 eta 920, hurrenez hurren). Araban 558 langabe gehiago zenbatu dituzte, eta hamahiru Nafarroan. Hala, biztanleriaren %10 da langabea (%12,4 emakumeen artean, eta %7,9 gizonen artean)