“Gure herriaren borondatea gauzatzeko giltzarrapoa” da Espainiako Konstituzioa, diote; “zer irabazten dugu guk, gure interesen aurkako erabakiak hartzen dituen Estatu baten barruan? Debatea ez da monarkia ala errepublika, debatea da monarkia ala errepublikak”, gaineratu du Arnaldo Otegi alderdiko idazkari orokorrak.

Beste hainbaten artean, Oihana Etxebarrieta legebiltzarkideak ere hartu du hitza: Sanferminetako talde bortxaketaren epaia jakin berritan, Espainiako justizia patriarkala kritikatu eta politika egiteko modu berriak behar direla adierazi du, “Euskal Herriko errepublika feminista eraikitzeko, elkar hartuta, elkar babestuz”

“Ezinezkoa da Espainiako Estatua demokratizatzea”

Independentistak sareak ere bat egin du manifestazioarekin. Katalunia gogoan, “argi ikusi da nola erreakzionatu duen ultranazionalismo espainiarrak –diote–, ezinezkoa da Espainiako Estatua demokratizatzea, eta bere egituren barruan Euskal Herriak ez du inolako burujabetza aukerarik”.

Bestalde, Espainiako Konstituzioak zilegitasunik ez duela onartu zuten asteazkenean Gipuzkoako Batzar Nagusietan, EAJ eta EH Bilduren aldeko botoekin. Bilboko manifestazioan Pablo Gorostiaga preso ohiak adierazi duenez, duela 40 urte Konstituzioari "ezetz" esan zion euskal gizarteak: “Ezin izan dute gure izenean hitz egin. Ez dute esaterik izan Euskal Herriak konstituzioa onartu zuela”.