ARGIA.eus

Bultza kazetaritza independentea

Etxeko energia egoera aztertzeko doako zerbitzua jarri du herritarren eskura Goienerrek

  • Europako funtsekin finantzatutako PowerPoor programaren helburuak dira baliabide energetikorik gabeko herritarrei laguntzeko egitasmoak garatzea, eta finantzaketarako aukera alternatiboak sustatzea. Alor horretan aholkulari lana egiteko formatu ditu hainbat pertsona Goiener kooperatibak, eta herritarren eskura jarri du doako aholkularitza zerbitzua, norbere etxeko energia egoeraren azterketa burutzeko.

ARGIA
@argia

2023ko urtarrilaren 23a - 10:15
Azken eguneraketa:12:36

"Energia-sistema bidezko batek ezin du inor utzi duin bizitzeko oinarrizko baliabiderik gabe, esaterako, energiarik gabe". Goiener energia berriztagarrien sorkuntza eta erosle kooperatibaren hitzak dira, zeinaren hitzetan, hasieratik izan duen ondoko printzipioa: "Energiak herritarrena eta herritarrentzat izan beharko luke". Ildo horretako lana Goiener Soziala programaren bidez eraman du aurrera, eta pobrezia energetikoari aurre egin ahal izateko beharrezko tresnak prestatu eta eskuratzeko laguntza eskaini die norbanako zein kolektiboei. Norabide horretan sakontzeko aukera ahalbidetu die Europako funtsekin finantzatutako PowerPoor programak; besteak beste, herritarrei ahalbidetzen die aholkulari baten bisita eskatzea, etxeko egoera energetikoa aztertu dezan. Behin azterketa eginda, beharrik balego, aholkulariek gidaritza eskaini dezakete, "herritarrek neurriak har ditzaten energiaren erabilerarekin lotutako portaerak aldatu nahiz efizientzia energetikoa hobetzeko". Zerbitzua doakoa da, eta interesa duenak eskatu dezake lotura honetan.

2020an jarri zen PowerPoor proiektua martxan, eta Europar Batasuneko zortzi eremutan ari da gauzatzen. Espainiako Estatuan ez ezik, Bulgarian, Kroazian, Estonian, Grezian, Hungarian, Letonian eta Portugalen ere jarri da abian, ondoko helburuekin: baliabide energetikorik gabeko herritarrei laguntzeko programak garatzea, batetik; eta finantzaketarako aukera alternatiboak sustatzea, bestetik –kooperatibak eta finantzaketa kolektiboa aipatzen dituzte–. Pobrezia energetikoa murrizteko herritarrak "konponbidearen erdigunean" kokatu nahi ditu, eta horietan aldaketa bultzatu: "Pobrezia energetikoan egotetik kontsumitzaile informatu izatera igaro, ondoren prosumitzaile (ekoizle eta kontsumitzaile) aktibo izatera iritsi ahal izateko". Orotara, pobrezia energetikoa bizi duten 22.000 etxe baino gehiago barne hartzen ditu proiektuak.

Goienerren arabera, zaurgarritasun egoeran dauden norbanakoen "ahalduntzea" ahalbidetzen du PowerPoor programak. Helburu horrekin, Goiener kolaboratzaile sare zabala ari da koordinatzen, sare horren eginkizuna izanik PowerPoor programak garatutako tresnak eta jakintzak praktikan jartzea. Zehazki, egoera energetiko zaurgarrian dauden pertsonei laguntza pertsonalizatua eskaini ahal izateko formakuntzak ari da aurrera eramaten. Formakuntza burututako pertsona horiek bilakatzen dira aholkulari, eta energia egoera aztertzeko eskakizuna egiten duten etxeetara joateaz arduratzen dira. Aholkularitzaren baitan, ondoko informazioa jarriko da herritarren esku: etxeko energia berriztagarriaren sorrerari, energia aurrezpenari eta efizientziari buruzkoa, batetik; eta bestetik, finantzaketarako bide alternatiboei buruzko informazioa ere eskainiko zaie, komunitate energetikoen, kooperatiba energetikoen edo crowfunding-en ingurukoa kasu.

Horretaz guztiaz gain, proiektua baliatu nahi da pobrezia energetikoaren inguruko bulegoen sorrera bultzatzeko, formakuntzatik pasatako zenbait norbanako eta erakunde eginkizun horretara bideratuz. Horrek ahalbidetuko luke, kooperatibaren arabera, PowerPoor proiektuaren bidez barneratutako jakintzari eta tresnei jarraipena ematea, eta zaurgarritasun egoeran dauden herritarrentzako programak luzatzea. Izan ere, PowerPoor programa abuztuaren 31n emango da itxitzat. Behin programa indargabetuta, "emaitzek arduradun politikoen ezagutza-maila hobetuko dute, eta mundu zabalean zein EBn garatuko diren ekimenetan erabiliko dira".

 


Energia berriztagarriak kanaletik interesatuko zaizu...
2023-01-26 | ARGIA
Azazetako zentral eolikoarentzat ere ingurumen baimena eman du Jaurlaritzak

Aixeindarrek, Iberdrolak eta Eusko Jaurlaitzaren Energiaren Euskal Erakundeak osaturiko sozietateak, Azazetan egin nahi duen zentral eolikoarentzako ingurumen baimena lortu du administrazio publikoaren partetik. Nafarroan, ingurumen sailak jakinarazi du jadanik 35 azpiegiturari... [+]


2023-01-25 | ARGIA
Pablo Lorente, Sustrai Erakuntza
"Energia berriztagarriekin prezio egokiak izatea lortuko dela saltzen digute eta ez da egia"

Sustrai Erakuntzako kidea den Pablo Lorente elkarrizketatu dute Eguzki irratian, urtarrilaren 11n. Nafarroako Horizonte 2030 plan energetikoa izan dute mintzagai, eta CO2 emisioak gutxitzeko nolako gizarte, ekonomia eta energia eredurantz jo behar litzatekeen azaldu du... [+]


Aurretiko ingurumen ebaluaziorik egin gabe eraiki ahalko dira energia berriztagarrien makroproiektuak

Atzeko atetik arindu du legedia Espainiako Gobernuak: ikerketa sakonak nahitaez egiteko makroproiektuen energia ekoizpenaren gutxieneko muga lau aldiz handiagoa ezarri du. Energia krisiaren aurrean prozesu administratibo oro azkartu nahi dute erakundeek.


Aritz Ameztegi, 'Debagoiena 2030'
“Inpaktua bada eskualdean bilatzen duguna, udal eta eragile guztiei entzun behar zaie lehenik”

Beterri Saretuz eraldaketa egitasmoak gonbidatuta, Debagoiena 2030 sareko Aritz Ameztegik hitzaldia eman du Andoainen asteazkenean. Eskualde batean eraldaketa lortzeko nola eragin litekeen gako batzuk eskaini ditu.


2023-01-19 | ARGIA
Parke eolikoen proiektuak geldiarazteko eskatu du ELAk, Lurraldeko Plan Sektoriala onartu arte

Lurraldeko Plan Sektorialak zehaztuko du energia berriztagarrien azpiegiturak "non eta nola" jarri daitezkeen. Hori onartzeko urte eta erdiko prozesuaren aurretik, Espainiako Gobernua eta Eusko Jaurlaritza parke eolikoak eraikitzeko baimenak ematen hasi dira:... [+]


Eguneraketa berriak daude