Dirua sekretuan Adidas-eko buru zen Robert Louis-Dreyfusek utzi ziela argitaratu du De Spiegelek. Garai hartan Alemaniako Futbol Federazioko buruak eta Alemanian sinbolo bat den Franz Beckenbauerrek bazuten guztiaren berri agerkariaren arabera. Adidasek era pribatuan egindako ekarpen ekonomikoak ez ziren Alemaniako batzordearen aurrekontuetan jasotzen.

Dirudienez, 24 pertsonak osatzen duten FIFAren Batzorde Exekutiboko Asiako lau ordezkarien botoa ziurtatzeko erabili zuten mailegua. Lauek Europako ordezkariekin bat egin zuten Alemania hautatzeko orduan, 2000ko uztailean. Zeelanda Berriko ordezkariak azken orduan abstenitzea erabaki ostean, Alemaniak irabazi zuen txapelketa antolatzeko txartela 12:11 bozkaketan.

2000. urtean txapelketaren antolakuntza irabazi ostean, eta kopa hasi baino urte eta erdi lehenago, Dreyfusek dirua bueltan eskatu zuen. 2005ean Beckenbauer eta Batzorde Antolatzaileko lehendakari ordea diru ilegala bueltatzeko moduak bilatzen hasi ziren.

Spiegelek dioenez, dokuementuek erakusten dute ordainketa errazteko FIFAren azpi adar bat baliatu zutela. Alemaniarrek Dreyfusi zor zioten kopurua jarri zuten Berlingo Estadio Olinpikoan egin behar zen FIFAren Irekiera Zeremonia baterako, baina gala hori ez zen sekula antolatu. Hortik, FIFAk Zurichen Louis-Dreyfsena zen kontu korronte batera bideratu zuen dirua.

FIFAren ustelkeri kasuek azken urteotan zeresana eman duten bezala, Alemanian lurrikara ekar dezaken kasua da ostiralean De Spiegel aldizkari alemaniarrak azaleratutakoa.