Ertzaintzaren gehiegikeri eta erasoek oinarri arrazista dutela gogor deitoratu du Bizkaiko SOS Arrazakeria taldeak. Bilbon bizi den gazte magrebiar bati martxoaren 30ean poliziak egindako eraso bortitza du plataformak azken adibidetzat. Eraso horri buruzko irakurketa plazaratu du SOS Arrazakeriak: "Arrazakeria instituzionala, zuriak ez diren pertsonak kontrolatzeko, diskriminatzeko eta erasotzeko tresna dela agerian geratzen da".

Hori horrela eta diskriminazio horiekin behin betikoz bukatzeko, "Ertzaintzaren barruan kontrola bermatzeko barne-mekanismoak aktibatzen jarraitzeko" eskaera luzatu du plataformak, gehiegikeriak ikertzeko galdea ere eginez.

Testuinguru horretan, komunikabide batzuek daukaten diskurtsoa eta analisia ere deitoratu du: "Komunikabide batzuek errepresio honi bermea ematen diote, albiste faltsuak, nahasiak eta "albistearekin" zerikusirik ez duten pertsonen argazkiak argitaratzen ari baitira, eta gorrotoaren diskurtsoa sustatu baino ez dute egiten".