Errusiako Iraultza Emakumeen Nazioarteko Egunean hasi zeneko hura

  • Petrogradoko kaleetako denda eta biltokietan ogia erosteko ilara bukaezinetan bat egiten zuten egunero milaka emakumek; goseak eta gerrak sortutako ezinegona nagusitzen ari zen. Zerbait handia zetorrela susmatu zitekeen 1917ko Emakumeen Nazioarteko Egunaren bezperatan, baina inork ez zion garrantziarik eman. Errusiako Iraultzaren eztandaren zuzia piztu zuten emakume haiek.


2017ko azaroaren 12an - 16:00

Emakumeen Nazioarteko Eguna  

Clara Zetkin ekintzaile alemaniarrak zazpi urte lehenago Kopenhagen ospatu zen Emakume Sozialisten Nazioarteko Bigarren Konferentzian, Emakumeen Nazioarteko Eguna ospatzeko mozioa aurkeztu zuen. Emakumeen boto eskubidearen aldeko borroka bultzatzeko neurriak hartu, emakumeen sufragioari izaera internazionalista aitortu eta ikuspegi sozialista batetik eztabaidatzearen beharra azpimarratzen zuen. Arazo hauen inguruko interesa pizteko, manifestazioak eta ekintzak antolatzea proposatu zuen. Bere idatzi eta hitzaldietan, sozialismoa berez feminista dela aldarrikatuko du, berdintasuna lortzeko ezinbesteko tresna.

 

 

Clara Zetkin eta Kopenhageko Emakume Sozialisten Bigarren Nazioarteko Konferentziaren behin behineko egitaraua (1910). Emakume sozialistak saretzeko neurriak, emakumeen bozka eskubidearen aldeko lan praktikoa eta amatasuna zein haurren zaintza soziala aipatzen dira bertan.

 

 

Errusiako kasuan, Alderdi Langile Sozialdemokratak 1913an ospatu zuen eguna lehen aldiz eta Errusian ezarritako egutegi julianoaren araberako otsailaren 23a aukeratu zuten horretarako, egutegi gregoriarrean, martxoaren 8a. Aurreko urteetan bezala, Emakumeen Nazioarteko Eguna asanblada, hitzaldi eta manifestuek ardaztuko zutela pentsatzen zuten denek, baina 1917ko hura ez zen aurrekoak bezalakoa izan.

Lehen Mundu Gerraren ondorioz gosea eta prekarietatea ziren nagusi Petrogradoko (egun, San Petersburgo) kaleetan. Gizonezkoak frontera joatera behartuta, emakume langileen kopurua biderkatu egin zen, lan baldintzak okertu ziren eta inflazioaren eraginez elikagaien garestitze izugarria eman zen. Ehun-lantegietako emakume langileak izan ziren egoera jasanezin honen aurrean antolatzen hasi ziren lehenak; Emakumeen Nazioarteko Eguna aukeratu zuten lehen greba deialdia egiteko.

 

Ogia eta bakea

Erakunde bat berak ere ez zuen greba deialdiarekin bat egin. Leon Troskik idatzitako Errusiako Iraultzaren Historia (1932) liburuan, talde boltxebike borrokalariena ere, Viborgeko langile auzoko komitea, greba ez egitearen alde agertu zela aipatzen da. Ez omen zen horretarako momentu egokia. Hurrengo egunean ordea, Komitearen erabakia desobedituta, hainbat ehun-lantegitako milaka emakume grebara irten eta lantegiz-lantegi, beharginak mobilizazioetan parte hatzera gonbidatzera atera ziren.

Ogia, bakea eta Zar-aren kanporatzea exijitzen zituzten. Duma (1905ko nekazarien protesten ondorioz ezarri zen parlamentu zarista) zaintzen ari ziren kosakoei, indar armatu errepresiboenak bezala ezagun ziren horiei, aurrez-aurre begiratuta esaten zieten: “Gure senarrak, aitak eta nebak frontean ditugu. Eta guk, gosea besterik ez dugu, lan karga itzelak, erasoak, gutxiespenak eta gehiegikeriak. Zuek ere badituzue amak, emazteak, arrebak eta alabak. Ogia eta gerraren amaiera eskatzen dugu”.

Lehen eguna lasai joan zen eta agintariek ez zioten protestari berebiziko garrantziarik eman. Baina hurrengo goizean, metalurgiako enpresa erraldoietako beharginak grebara batu ziren eta hauekin batera, beste hainbat eta hainbat auzo eta lantegietako komiteak. Inork ezin izango zuen imajinatu Emakumeen Nazioarteko egun hura, Errusiako Iraultzaren lehen eguna izango zenik. Ez eta, gainerako herrialdeetako komite sozialistek Emakumeen Nazioarteko Eguna behin-betiko finkatzeko mugarria izango zenik ere.

 

 

Emakumeen bozka eskubidearen aldeko manifestazioa Petrogradon

Ondorengo egunetan gertaerak bata bestearen atzetik lotu ziren. Masa iraultzaileak bost egunez kaleak hartu zituen eta ofizial zaristen desarmatzea, erakunde publikoen okupazioa zein preso politikoen askapena lortu zuten, besteak beste. Zarra abdikatzera behartu eta erregimen zaharra, behin-behineko  gobernu batek ordezkatu zuen. Gora behera handiko hilabeteak izan ziren haiek eta 1917ko urrian gobernu hau kendu eta boltxebikeek (Errusiako Langile Alderdi Sozialdemokratako fakzioa, Leninek gidatutakoa) hartu zuten boterea.

Aurrekaririk gabeko eskubideen jabe

Iraultzak segituan bereganatu zuen eraldaketa sozial eta politiko handiek emakumeen emantzipazioari lotuta joan beharko zutenaren ideia. Urte luzez emakumeen eskubideen alde aritutako kamarada ugari sartu ziren gobernu berriko komiteetan, besteak beste:

Hauen lanak eta egunetik egunera antolatzen ari ziren milaka emakume langileren ekarpenak eragin nabarmena izan zuten 1918ko Kode Zibilaren idazketan. Gaur egungo ikuspegitik, sinestezinak dirudite lortu zituzten hainbat eskubidek. Abortu eskubidea, doakoa eta librea; dibortzioarena, kideetako bakarrak nahiez gero bideratuko zena; ezkondu eta ez-ezkonduen eskubideak parekatzeko neurriak; aitaren derrigorrezko abizena jartzearen debekua; haurtzaindegi eta zaintza zerbitzu komunitarioen sorrera; maitasun eta batasun librearen aldeko aukeren eztabaida; homosexualitatea eta genero identitateen gaineko hausnarketa aurrerakoiak; eta batez ere, emakumeen ahalduntze eta emantzipazioa sustatzeko sare eta taldeen antolaketa, atez-ate, auzoz-auzo, lantegiz-lantegi eta herriz-herri egin zena.

Cinzya Arruzak “Las sin parte: matrimonios y divorcios entre feminismo y marxismo” (2015) liburuan dio, gerra zibilak eta egitura ekonomikoen itotzeak sortutako zailtasunak, erresistentzia kontserbadoreak eta bestelako oztopoak handiak izan ziren arren, ez dela emakumeek garai eta leku hartan lortu zuten askatasun eta duintasun maila ahalbidetu duen gertaera historiko antzerakorik eman historian. Eskubide osoko subjetuak, bizitza publiko eta sozialean parte hartzeko aukera guztien jabe, bestelako ordena sozial eta politiko bat eraikitzeko aukera izan zuten emakume errusiarrek. Boltxebikeen ekintzen kontraesanak ukatu gabe, Errusia Iraultzailean, hogeigarren hamarkadaren amaiera arteko garaian behinik behin, aurrekaririk gabeko askatasun aukerak lortu zituzten. Emakumeen emantzipazio eta auto-antolaketa eta langile mugimenduaren arteko loturak inoiz baino agerikoago egin eta horrela artikulatzearen aldeko apustua egin zen. Laster etorriko zen ordea estalinismoa eta berarekin, dagoeneko burokratizatutako Hirugarren Internazionaleko alderdi komunisten politika, zeinak lotura hauek guztiz suntsituko zituen.

 

Liburuen paradoxa

Zenbat aldiz erabili izan ote den irudi hau martxoaren 8ko mobilizazioetara deitzeko… ezta? Lilya Brik idazle errusiarraren aurpegia propaganda kartel sobietar honi esker zaigu ezaguna. Leningradoko (iraultza ostean Petrogradok hartu zuen izena) inprenta estatalerako sortua, zirilikoz idatzita jakintzaren arrama guztietako liburuak hitzak oihukatzen ageri da zuri-beltzean ateratako argazkian, Aleksandr Ródchenkok 1924ak diseinatutako kartel konstruktibista honetan.

 Iraultzaren osteko lehen urteetan herritarren alfabetatzea sustatu nahi izan zuten agintariek eta hasierako  neurrietako bat, literatura unibertsala errusierara itzuli eta poltsikorako formatuan argitaratzea izan zen. Maksim Gorki idazlearen gidaritzapean munduko “maisulan” guztiak itzultzeko enpresa jarri zen martxan.  Urteetako negurik gogor eta gorrienei aurre egin behar izan zieten ordea herritarrek iraultzaren hasierako urte haietan. Kontatzen denez, liburu horietako askok eta askok etxeak berotzeko sutan erreta bukatu zuten. Testuinguru, kontraesan eta paradoxa horien artean gorpuztu zen Errusiako Iraultza.

Jardunaldiak Oñatin

Hauetaz eta bestelakoez arituko gara datorren azaroaren 5etik 19ra Oñatin Errusiako Iraultzaren mendeurrenaren harira antolatu diren jardunaldietan. Hemen ARGIAn argitaratutako berria, film labur umoretsua (ez galdu!!) eta egitaraua.

Eta hemen, Ahoz Aho saioan gai honen inguruan egindako sinadura (53.40 minututik aurrera).


Kanal honetatik interesatuko zaizu: 1917ko Errusiar Iraultza
Kiev ala Kyiv?

XIX. mendearen amaieran, ukrainera modernoaren arauak ezarri zirenean, haietako batek zioen hiriburuaren izena Київ zela ukraineraz, eta haren forma latinizatua, hau da, mendebaldeko herrialdeek erabili beharreko exonimoa Kyiv zela. Baina munduko txoko gehienetan... [+]


2020-11-19 | Julen Azpitarte
Wu Ming kolektiboaren 'Proletkult' nobela
Marxismo martetarra

Wu Ming literatur kolektiboaren Proletkult (2018) “objektu narratibo” berriak sozialismoa eta zientzia fikzioa lotzen ditu, Sobiet Batasuneko zientzia fikzio klasikoaren aitzindari izan zen Izar gorria (1908) nobela eta haren egile Aleksandr Bogdanov boltxebikearen... [+]


Legezko abortuak 100 urte

Sobietar Batasuna, 1920ko azaroaren 18a. Sobieten Gobernu Zentralak abortua legeztatzeko dekretua onartu zuen, historian lehenengoz. Handik aurrera, librea izateaz gain, doakoa ere izango zen. Urte batzuetan behintzat.


Moskuko Plaza Polita

Moskuko Plaza Gorriaren izena nondik datorren pentsatzean bi aukera bururatu ohi zaizkigu...


Potemkin, fikzio eta errealitatearen artean

Krimeako konkista zuzendu zuen militarrak, Ukrainako gobernadore Grigori Potemkinek (1739-1791) Katalina II.a erreginari aurkeztu zizkion herri idilikoak faltsuak omen ziren. Hortik dator “Potemkin herria” esamoldea.


Jevgenija Box estatuburu izatera iritsi zen orain 100 urte

Ukraniako Sobietar Errepublika izendatu zenean, emakume bat jarri zen hango Barne ministro, eta praktikan gobernuburu ere izan zen, ofizialki ez baitzen halako kargurik. 1917ko abenduaren 27a zen, eta kasik oharkabean emakumeen emantzipaziorako borrokan itu bat jarri zuen... [+]


2017-11-21 | Juan Mari Arregi
Errusiar iraultzatik iraultza antikapitalistara

Prentsan gogorarazi digute 1917ko errusiar iraultzaren data historikoa.


Botere guztia sovietetara!

Kontsigna hau gakoa izan zen 1917ko hilabete zurrunbilotsu horietan. Nicolas II.a tsarrak abdikatu ostean 1917ko martxoan (momentu horretan Errusian zegoen juliotar egutegian otsaila zen) sortutako behin-behineko gobernuan sozialdemokratak parte hartzen ari ziren, liberal eta... [+]


2017-10-24 | Axier Lopez
Iraultza sobietarraz ikasteko jardunaldiak antolatu dituzte Oñatin

Errusiako iraultzak azaroan 100 urte beteko dituela baliatuz, Oñatin jardunaldiak prestatu dituzte azaroaren 5etik aurrera. “XX. mendeko gertakari garrantzitsuenetariko bati buruz gehiago ikastea eta gizarte ereduaz eztabadaidatzea” dira helburu nagusiak.


2017-03-23 | Josep Fontana
Errusiar iraultza eta gu

Pompeu Fabra unibertsitateko historiako irakasle emeritua da Josep Fontana Bartzelonan. LARRUN 172. zenbakian egin genion elkarrizketan duzu haren berri zabalago. 2016ko urrian La revolució russa i nosaltres hitzaldia eman zuen Bartzelonako Unibertsitate Autonomoan,... [+]


Iraultza, iraultzaren aurretik

Sobietarren eraginik gabe ezingo litzateke XX. mendea ulertu, ezta gaur egun mundu zabalean gertatzen diren gatazka politiko eta beste egoera sozial ugari ere. Josep Fontana historialariak (Bartzelona, 1931) Bartzelonako Unibertsitate Autonomoan 2016ko urrian emandako hitzaldia... [+]


Eguneraketa berriak daude