ETAko "kide aktibo" izan zela ebatzi du Parisko Zigor Auzitegiak atxilo hartu eta sei urtera egindako epaiketan, baina epaimahaiak aitortu du ez dela gai zehazteko "zein gradutan" izan zen erakundeko kide.
Joan den ostegunean epaitu zuten Mikel Irastorza euskal herritarra Parisen, "gaizkile talde bateko kide" izatea leporatuta. Duela sei urte hartu zuten atxilo Frantziako Poliziaren eta Espainiako Guardia Zibilaren arteko operazio batean. Lapurdin, Azkainen bizi den donostiarra da Irastorza, ogibidez kazetaria Mediabask hedabidean.
Parisko Zigor Auzitegiak frogatutzat jo du Mikel Irastorza ETAko "kide aktibo" izan zela, baina aldi berean, eta zigorra arintzeko baliagarri, epaimahaiak aitortu du ez dela gai izan zehazteko "zein gradutan" izan zen erakundeko kide. Hiru urteko kartzela zigorra ezarri diote Irastorzari –36 hilabete–, baina gauzak ondo ez du espetxera itzuli beharko, horietatik hamazazpi hilabete ez dituelako beteko ez badu datozen bost urteko epean maila bereko deliturik egiten. Dena den, geratuko litzaioken zigorra dagoeneko betea du.
Bestalde, epaimahaiak ez dio Frantziako Estatuko lurraldean bizitzeko debekurik ezarri, eta ez da FIJAIT arau-hauste terroristen egileen Frantziako fitxategi judizial automatizatuan sartuko. Epaimahaiak Euskal Herrian izan den "bake-prozesua" hartu du aintzat erabakia hartzeko orduan, azken hitzartzean jakinarazi duenez.
ETArekin harremana
2016ko azaroa hasieran hartu zuten atxilo Irastorza, lau urte lehenagoko ustezko gertakari batzuk medio, baina hilabete gutxira aske gelditu zen kontrol judizialpean. Espainiako prentsak eta Barne Ministerioak zabaldutako berrien arabera, ETAko "azken buruzagia" zen Irastorza. Halakorik ez du frogatu Parisko Zigor Auzitegiak, ezta gutxiagorik ere.
ETArekin harremana izan zuela aitortu du epailaren aurrean Irastorzak, baina ukatu egin du ETAko kide izatea. Irastorzaren arabera, 2010ean joan zen Ipar Euskal Herrira, baina inola ere ez "ihesi", eta aurkakorik ez dute esaten Poliziaren txostenek. ETArekin harremana 2012ko uda bukaeran izan zuen Irastorzak, bere esanetan. Hitzordu bat izan zuen, Okzitaniako Tolosan geratu zen erakundeko kide batzuekin, eta begiak itxita mendira eraman zuten. Pare bat egunez-edo egon zen han, ezagutzen ez zuen lekuan eta ezagutzen ez zituen bi pertsonarekin. Horren ondotik, hilabete batzuk klandestinitatean eman zituen Irastorzak, eta ondoren Euskal Herrira itzuli. Tarte horretan, "prestakuntza informatikoa" jaso zuen, hala aitortu du, baina "ez sekula prestakuntza militarrik", eta zin egin du ez duela inoiz armarik eraman.
Gatazkaren konponbide prozesua garrantzitsua izan da epaiketan. Irastorzak aitortu du erabat sinesten zuela jarduera armatuaren amaieran, eta konponbide politikoaren alde jardun zuela nabarmendu zuen. 2011ean iragarri zuen ETAk jardun armatuaren amaiera, eta gertakari guztiak berantago jazo ziren.
Espainiako Auzitegi Nazionaleko Manuel Carcía Castellón epaileak sei pertsona epaituko ditu Ongietorrien auzian: Antton López Ruiz Kubati, Kai Saez de Egilaz, Pipe San Epifanio, Haimar Altuna, Oihana Garmendia eta Oihana San Vicente. Guztiak Sortuko kideak... [+]
Astelehenean jakinarazi du albistea Etxerat elkarteak. Otxandioko preso politikoa baldintzapeko askatasunean zegoen 2023ko martxoaz geroztik.
Kontzertuen bidez euskal preso eta iheslariak laguntzea da xedea. Aurten, Rakatapunk, Xutik eta Esne Beltza dira egitarauan.