Ostegun goizean aurkeztu dute gida Auzoan Bizi Etxebizitza Sarea, Errekaleor Bizirik!, Batuta Elkarlaguntza Sarea, Ongi Etorri Errefuxiatuak Araba eta Gasteizen Inor ez Etxerik Gabe mugimenduek, Gasteizko Udaletxearen aurrean. Apirilean hasi zuten Erroldarik Gabe, Izaterik ez! kanpaina, “erroldaren problematika azaleratu, udala erantzuletzat seinalatu eta konponbide bat exijitzea” helburu.

Errolda, gainontzeko eskubideetarako sarbide

Gogoratu dute erroldak, legearen arabera, herritarra bizi den tokia erregistratzen duen tramite administratibo sinplea beharko lukeela. “Kalean edo etxe batean bizi, etxea kontratuarekin edo kontraturik gabe izan edota okupatzen bizi, ez da kontuan hartu beharreko baldintza erroldatzeko, berez”. Praktikan, ordea, Euskal Herri osoan bezala Gasteizen, “baliabide eta eskubide ezberdinetarako sarbidea bihurtu da errolda”. Prestazio sozialak eskatu ahal izateko, eskolatzeko, osasun txartela lortzeko edo, migratzaileen kasuan, erregularizazio prozedura abiatu ahal izateko baldintza da errolda, besteak beste.

Gida aurkeztu duten kolektiboen esanetan, Gasteizko Udalak erroldatzeko eskatzen dituen baldintzak “etxe jabeen esku uzten ditu erroldatzeko eskumena”. Hori dela eta, badira pertsonak, esaterako, etxebizitza batean alokairua ordaintzen bizi arren bertan erroldatu ezin direnak; edo, alderantziz, etxe batean erroldatu ditzaten ordaintzen dutenak bertan bizi ez arren. “Etxe jabeen gehiegikerien eta erroldaren merkatu beltzaren konplize zuzena da udala”, adierazi dute, eta azpimarratu bereziki gasteiztar migratuei eta pobretuei eragiten diela egoerak. Azaldu dute apirilean eskatu ziotela udalari baldintza horiek aldatzeko, baina “inongo erantzunik edo aldaketarik egin ez duela ikusita”, Autodefentsa Juridikorako Gida aurkeztea erabaki dutela.

Errolda indibiduala eskuratzeko eta borroka kolektiborako erreminta

Gidak hainbat atal ditu. Sarreran jaso dituzte erroldatu ahal izateko egun udalak ezartzen dituen baldintzak. Ondoren eskaintzen dituzte erroldatu ahal izateko erremintak, bi egoera nagusi aintzat hartuz: batetik, bizileku finkoa izan arren jabetzarik edo kontraturik ez izateagatik erroldarik ez duten herritarrei begira; bestetik, kalean edo bizitoki finkorik gabe bizi diren herritarrentzako baliabideak. Egoera bakoitzean errolda lortzeko zer pauso egin behar diren azaltzen du gidak, horiek emateko administrazioan aurkeztu behar diren dokumentuen ereduak jasotzen ditu, eta aholkularitza eta laguntza jasotzeko bideak eskaini ere.

Gida eskuragarri dago aipatu kolektiboen sare sozialetan eta @erroldarikgabe X eta Instagram kontuetan. Paperean, Alde Zaharreko Gasteiz Txiki auzo elkartearen egoitzan eskuratu daiteke. Gidarekin hainbat helburu dituztela azaldu dute agerraldian: herritarrei errolda lortzeko bide kolektibo bat eskaintzea, udalaren prozedura administratiboan aldaketak lortzea, eta klase “zapalkuntza estrukturalaren” aurrean antolatu eta indarrak batzea, “aldatu behar den guztia aldatzeko”.