Orain dela bi urte, Iruñean norbanako talde bat Haritu elkarlaguntza sarean antolatzen hasi ginen langile klasearen pobretze orokortuari kolektiboki aurre egiteko helburuz. Elikadura eta etxebizitzara iristeko handituz doazen zailtasunak medio, Harituko Elkartasun Biltegia eta Etxebizitza Sindikatua sortu genituen.

Elkartasun Biltegia 110 partaidez osatua dago dagoeneko eta hiriko supermerkatu ezberdinetan hamabost egunez behin egiten ditugun bilketekin sostengatzen da. Gainera, baratze eta olibadi bana ditugu autogestiorako. Ibilbide sozial eta politiko anitzeko lagunak biltzen gara. Horrek elkar ulertze ariketa oinarrizkoa izatea suposatzen du; hala nola hizkuntzena (wolof, arabiarra, frantsesa, euskara edo gaztelera), militantzia praktikena, eta pentsatzeko, sentitzeko eta egiteko era ezberdinena.

Etxebizitza Sindikatua, berriz, etxebizitzaren jabearekin gatazkan dauden maizterrekin antolatu da. Dozenaka maizterrekin beraien eskubideen inguruko aholkularitza egin eta horiek bermatu ditugu. Hainbat etxegabetze geldiarazi dira, horiek denak alokairukoak. Denetariko problematikak salatu dira. Etxebizitzak bizitzen garapen eta zaintzarako oinarrizkoak direla ez diogu esateari utziko. Halere, etxebizitza baterako sarbidea geroz eta mugatuagoa da askorentzat. Soilik Nafarroan, azkeneko zazpi urteetan %40 hazi dira alokairuak. Sarbiderako baldintzek egoera zaurgarrian dauden pertsonek edota lanpostu prekarioak dituzten pertsonek etxe bat izatea zailtzen dute.

Etxebizitzen erabilera turistiko eta aldi baterakoaren hazkundeak, irabaziak biderkatzea ahalbideratzen die jabeei (gehien bat jabe ertain eta txikiak) eta prezioen igoeran laguntzen du. Gure hiriak arpilatuak izaten ari dira. Honi gehitu behar zaio, etxebizitzen kudeaketarako inbertsio funtsen geroz eta agertze handiagoa. Hau da Testa-ren kasua Iruñean, zeinak hamaika alokairuren kudeaketa eskuratu dituen eta auzokideak itotzen saiatzen ari den alokairu kontratuen arrazoirik gabeko aldaketekin.

Gainera, aurrekaririk gabeko hornidura eta erregaien igoera, langabezia, soldata kaskarrak, erosketa-saskiaren prezioaren igoera, bereziki emakumeengan egokitzen diren zaintza lanen zamaren hazkundea… geroz eta gehiago kaskartzen dituzte bizi baldintzak eta bereziki, egoera araugabean dauden biztanleria arrazalizatuan. Bestetik, enpresari, banketxe eta errentadunak haien irabaziei atxikitzen zaizkiela ikusi dezakegu. Intermon Oxfam-ek helarazitako datuen arabera, munduko biztanleriaren %1ak munduan ekoiztutako aberastasunaren %63 pilatzen du. Gehitu diezaiogun guzti horri gainbehera ekologikoa, testuinguru globala, mugetan emandako heriotzak eta krisi energetikoa. Ez zaigu arrazoirik falta ibiltzen jarraitzeko.

Haritun bi urte daramatzagu oinarrizko beharren eta etxebizitzaren problematika era kolektiboan borrokatzen. Bi urte komunitatea ehuntzen auto-antolakuntzaren bitartez, lotuneak estutzen eta elkarlaneko dinamiketan lanean beste kolektibo batzuekin batera. Horren adibide dira Iruñeako saskibaloi eta futbol mundialito anti-arrazista, sarearen hedatzea Iruñeko auzoetan edota Hego Euskal Herriko beste etxebizitza sindikatu eta elkarlaguntza sareekin antolatze aldera eginiko apustua.

Bi urtez gure ustez arazo hauen kausa egiturazkoak direnak salatzen: etxebizitzaren merkantilizazioa, baliabideetarako sarbidean dagoen desberdinkeria, klase zapalkuntza, arrazismo instituzionala, emakumeen aurkako biolentzia. Bi urte eta hemen darraigu… zeren eta garrantzitsuena ez da pastela banatzea, baizik errezeta aldatzea.

Horregatik, urtarrilaren 29an, igandean, 13:00ean, Iruñeako San Frantzisko plazatik Oinarrizko beharren eta etxebizitzaren defentsan, antolakuntza! lemapean irtengo den kalejirara gonbidatzen zaituztegu, baita Zabaldin eginen den ondorengo otordura ere.

Antolatu eta elkarlaguntzan haritu!

Haritu elkarlaguntza sareko kideak

Asier Calvo Álvarez de Arkaia, Daniel Fuentes López, Oihana Idoate Errea, Ane Martínez Echeverría, Amaia Prieto Arratibel