Errekaleor, frackinga eta energia berriztagarriak

    Hasiera hasieratik funtsezkotzat ikusi genuen frackinga martxan jartzeko planen jatorria ezagutzea. Horregatik, kalea astintzen hasten ginen bitartean, zenbait hitzaldi antolatzeari ekin genion. Eta bide batez gaian adituak zirenek erregai fosilen gailurraren gora beherak azaldu zizkiguten, baita lotuta zekartzaten ondorio latzak ere. Erregai fosilen erreserbak topatzea gero eta zailagoa zela azaldu ziguten, baita erreserba hoiek ustiatzea gero eta garestiagoa zela, eta ustiatzen zirenak gero eta kalitate gutxiagokoak zirela ere.

    Bidean ehuntzen ari ginen jakituria hau egunez egun gure hitzaldietan geureganatu genuen. Azken finean argi ikusi genuen frackingaren teknika azaltzea ezezik garrantzitsua zela ere testuinguru energetikoa argitzea. Bidean eredu energetikoa egungo bizitza ereduaren motorea zela ohartu ginen ere. Energia, baliabideak etengabe ustiatuz bizitza suntsitzen duen sistema honen ezinbesteko motorea zela ulertu genuen. Era batean hala bestean guztiok bagenekien aurretik horrela zela, baina frackingaren aurkako azken urteotako borrokak perspektiba zabalago bat eman zigun eta arazoaren analisi askoz sakonagoa ahalbidetu.

    2013. urteko energia jaudunaldietan eta 2015.eko Frackanpadako hitzaldietan, egoeraren diagnostiko zehatz bat egiteaz gain, irtenbide argiak bilatzen saiatu ginen. Ahalik eta jende eta eragile gehien uztartzen zituzten estrategiak garatzen alegia, azken finean aurrean dugun hil ala biziko erronka honek guztion parte hartzea behar baitu. Horregatik, behin Eusko Jaurlaritzaren Fracking planak gelditzea lortu genuenean, bagenekien borrokak ezin zuela hor amaiera izan. Oinarrizko gatazka eta arazoak bertan darrai: kapitalismoa eta erregai fosiletan oinarritutako bere eredu energetikoak martxan jarraitzen du eta horri lotuta gure bizitza eta planetari mehatxua.

    Joan den urteko udazkenean, espero baino lehenago, lurra putzuz josteko eta gasa ateratzeko proiektu berrituen aurka martxan jarri behar izan genuen berriro; azken aldi honetan teknika konbentzionalen bidez suntsitu nahi dute gure herrialdea. Orduan, hausnarketa kolektibo baten ondorioz, Berriztu! jaio zen. Erregai fosilen menpekotasunari uko egiteaz gain Berriztu! eredu energetikoa eraldatzeko erronkarekin jaio zen, eta noski, horretarako egungo sistema kapitalistari aurre egiteko erronkarekin ere. Momentuz, eta kalean herriak izan duen erantzunari esker, Eusko Jaurlaritzak 2017ko udaberrian zulatzeko zituen planak bertan behera geratu dira. SHESAren arabera, erregai fosilak bilatzea beste helbururik ez duen Eusko Jaurlaritzaren enpresaren arabera, 2 urteko atzerapena izango du proiektu berriak. Denon esku dago gasa ustiatzeko planak behin betirako bertan behera geratzea.

    Eta guzti honek, zerikusia dauka Errekaleorrekin? Duela hilabete eskas Iberdrolak, Eusko Jaurlaritzako Industria Sailak aginduta, argindarra moztu ziola. Frackinga sustatu zuen Industria Sail berbera, ez konbentzionala den gasa ateratzeko, egun gas putzu “konbentzionalak” erabili nahi dituena. Iberdrola, Garoñaren jabea, oligopolio energetikoaren kide nabarmena den transnazional berbera eta guztioi fakturan lapurtzeagatik kondenatua izan den enpresa berbera.

    Errekaleorren aurkako eraso honen aurrean herriaren erantzuna eredugarria izan zen. Errekaleor etxebizitza eskubidea bermatzeko okupaziorako proiektu kolektibo bat baino askoz gehiago delako eredugarria, herrikoia, jendetsua eta anitza izan zen erantzuna.  Hori agerian utzi zuen ekainak 3ko manifestazioak. Manifestazio hurak bi helburu uztartu zituen; alde batetik Iberdrola eta Eusko Jaurlaritzaren erasoari erantzutea; bestetik bizi eredu berri bateruntz aurrerapausoak emateko konpromezua. Bizitza erdigunean jartzen duen bizi eredu bat, jasangarria, baliabide eta pertsonen amaigabeko ustiatzean oinarrituta ez dagoena.

    Horregatik, energia burujabetza lortzeko proiektu batean murgilduta zeudela esan zigutenean, energia berreiztagarrietan oinarritutako alternatiba batetan alegia, eta laguntza behar zutela helarazi zigutenean ez genuen zalantzarik izan. Bai Berriztu!k baita Fracking EZek ere atxikimendua eta geure harri-koskorra ipini dugu proiektu hau martxan jartzeko eta gutun honek Errekaleorreko crowfunding kanpainan parte hartzera animatzea du helburu. Besterik gabe, amaitu aurretik besarkada erraldoia bidali nahiko genieke Errekaleorreko bizilagunei. Guk argi daukagu! Herria bizirik nahi dugu!