Ernaik EAEko Turismo Agentzian egindako pintaketa bere gain hartu du bideo batekin
EAEko Turismo Agentziak Bilbon duen egoitza pinturaz zikindu eta "herria bizirik" dioen margoketa handia egin dute hainbat lagunek. Ernaik zabaldu du protesta bideo baten bitartez. Abuztuaren 17an "prekarietatean eta espekulazioan oinarritutako" egungo turismo ereduaren aurkako manifestazioa egingo dute Gernikan eta Donostian.
aurre egingo dieten hedabide independenteak
Bilbon du egoitza nagusia Basquetour "Euskadiko turismoaren jarduera ekonomikoa sustatzeko" elkarte publikoa. Asteazken goizean hainbat gaztek pintaketak egin dituzte, ondoren Ernaik zabaldutako bideoan ikus daitekeenez.
Eusko Jaurlaritzak sustatzen duen egungo turismo ereduaren izenean "entxufismoa, klientelismoa, esplotazioa eta prekarietatea" sustatzen ari direla salatu dute. EAJ, PSE-EE, Eusko Jaurlaritza eta Gipuzkoako Aldundiko hainbat kidek abuztuaren 17an Donostiako Aste Nagusian egingo duten manifestazioa bertan behera uzteko eskatu diote Ernairi. Mobilizazioarekin aurrera jarraituko dutela erantzun dute. Egun berean, Donostian ezezik, Gernikan ere kalera ateratzeko deia luzatu dute.
Eusko Jaurlaritzak Basquetourreko egoitzaren aurkako erasoa gaitzetsi du eta babes osoa eskaini dio EAEko turismoaren sektore, enpresa eta langileei.
