Asteazkenean jazo zen erasoa, eguerdiko 14:40ak aldera. Emakume beltz bat bere bi alabekin igo zen autobusera, patinete bat zeramatela. Txoferra patinetea tolestu gabe autobusera sartzeagatik oldartu zitzaion emakumeari, eta honek aurreko egunean esandako berbera erantzun: bere alabak beharrizan bereziak dituela eta behin autobusera igotakoan entretenituko zuela, berak patinetea tolestu ahal izateko. Gidariak bere alabaren beharrizan bereziak ez zaizkiola axola erantzuteaz gain, “a ze pazientzia hauekin” bota zuen, bideoan entzun daitekeenez. Emakumeak arrazista izatea aurpegiratu zion.

Autobus gidariak hasitako eraso arrazistak zenbait bidaiari emakumearen kontra egitera bultzatu zituen. “Zure herrira joan zaitez”, “Etorkin nazkagarriak, putakumeak”, “Nazka ematen didazue beltz zikinak”, “Hona zatozte eta dena kentzen diguzue” edo “Emakumea zarelako, bestela egurtuko nizuke” esaldiekin eraso egin ziotela azaldu du gertakaria mugikorrarekin grabatu zuen bidaiari batek.

Militarra zela zioen gizonezko bat bere alaba ukitu bitartean “militarra naiz, hogei urte daramatzat zu bezalako jendea akabatzen” esatera heldu zen. Esaldi honekin emakumea autobusetik jaitsi zen, gizonak heriotza mehatxua egiten zion bitartean.

Gertakaria jasotzen duen bideoaren jabeak Instagram sare sozialaren bidez zabaldu du grabaketa. Ondorioz, Gasteizko garraio publikoaz arduratzen den Tuvisa enpresak gertakariaren gaineko ikerketa abiatu du.

Gasteizko alkate Gorka Urtaranek agerraldia egin du jazoeraren gaineko balorazioa egiteko. Bideoak jasotzen dituen esaldi arrazistak “oso larritzat” jo ditu. Gidariaren zenbait jokaera egokiak ez zirela ere adierazi duen arren, honek inolako irregulartasunik egin ez duela eta hargatik zigorgabe aterako dela gehitu du.

Berria-k moldatutako bideoa ikusgai lotura honetan.