Elikadura burujabetzarako gida sortu dute hainbat gaztek

  • Gazteraiki topaketetatik sortutako proiektuak webgune modura hartu du itxura. Elikaduraburujabetza.eus-en topa daitezke nekazarien datuak.

Artikulu hau CC BY-SA 3.0 lizentziari esker ekarri dugu.

2017ko uztailaren 12an - 09:12

Elikadura burujabetzaren ildoan urratsak ematen joateko sareratu dute elikaduraburujabetza.eus webgunea. Oraindik erabat osatu gabe baldin badago ere, pixkanaka ari dira datuak sartzen, eta jada eskuragai daude Nafarroa, Araba, Gipuzkoa eta Bizkaiko nekazari ugariren datuak, herrika eta elikagaika sailkatuta. Eskuko liburuxka bat ere osatuko dute, Euskal Herriko gaztetxe eta gazte asanbladetara eramateko. Izan ere, herrietan elikadura burujabetza martxan jartzeko tresna praktikoa izan nahi du gidak. Nahi izanez gero norbere herriko ekoizleen informazioa ere bidali daiteke webgunetik bertatik edota helbide honetara idatzita: elikaduraburujabetza@gmail.com.

Barañaingo Gazteraiki topaketetatik ateratakoa da elikadura burujabetzaren gidarena, eta proiektuan buru-belarri aritu diren kideekin bideo-erreportajea osatu dugu:

 

Proiektuaren aurkezpena:

Zer proiektu gabiltza sortzen?

Elikadura-burujabetza ikuspegi politikoa da, herriak euren elikadura-sistema definitzeko duten eskubidea du oinarri, eta merkatuen zentralitatea, bizitzaren pribatizazio eta desberdintasunen orokortzea oinarri dituen eredu bakarrari egiten dio aurre; ikuspegi horrek bizitza eta elikadura erdigunean ipintzea, eta denon artean apustu horri erantzungo dioten eredu sozial eta ekonomikoak eraikitzea proposatzen du.

Esku artean dugun proiektua elikadura burujabetza ikuspegitik nekazaritza iraunkor batean lanean ari diren nekazarien gida bat da. Nekazarien bizimoduari, hurbiltasunari loturiko eta ekologikoki, sozialki, politikoki eta ekonomikoki sostengagarriak diren nekazaritza eta elikagaigintza sistema horiek aurkituko ditugu bertan.

Zergatik?

Egoera askotan bazkari, afari… etan gazte mugimenduak ez du ikuspegi hau aurrera eramaten arrazoi desberdinengatik; Izan daiteke ezjakintasunagatik, kontzientzia faltagatik edota erosotasunagatik. Berebiziko garrantzia dauka esparru honek kontsumo mota honi bultzada ematea, eta horregatik iniziatiba har dezagun erraztasunak eman nahi dira.

Non?

Gida paperean zein modu digitalean egongo da. Lehen pausua, liburuxka Euskal Herriko Gaztetxe eta Gazte Asanbladen eskuetara heltzea bermatzea izango da. Hala eta guzti, beste kolektibo zein norbanakok eskuragarri izango du.

Nori zuzenduta eta zertarako?

Elikadura-burujabetza, proposamen alternatibo integral eta ireki gisa ulertuta, antolatzeko bestelako moduak eraikitzeko markoa izango litzateke, eta gazte mugimenduaren xedea iraultza izanik, arlo honetan ezinbestean eragin behar dugu. Horretarako, gazteok kolektiboki zein norbanako moduan ikuspegi politiko honen baitan kokatzea ezinbestekoa da. Beraz, hauen esku jarri nahi den bitarteko honekin, elikadura burujabetza beharrezko ikuspegi gisa ulertarazi eta honekin ahalik eta koherenteen izateko irizpideak eman nahi dira. Azken finean arlo honen lanketa praktikora salto egiteko erraztasunak emango dituen liburuxka izango da.

Bestalde gure herrian ditugun produktu, ekoizle, proiektu eta dinamikak ezagutzera eman nahi ditugu, kontsumoa eraldaketarako tresna gisa ulertuta, erantzukizunak partekatuta eta ekoizleen eta kontsumitzaileen artean, landa-eremuaren eta hiri-eremuaren artean, hurbileko harremanak sortuz.

Nola?

Abiapuntutzat dugun proiektu honen garapena eskaini behar zaion esfortzuz daramagu aurrera. Herrialdeka antolatuta, nekazari hauek identifikatzen gabiltza.

Nork?

Elikadura Burujabetzaren lanketa egitera goazen gazteok osatzen dugu lantalde hau, eta arlo honekiko interesa eta grina duen edonork parte hartu dezake proiektu honetan.

Bestea:

-Gida hau ez da betiereko, aldaezin eta gida perfektu bat izango. Lanketa honen bidean lehen pausu bat izango da, eta nekazariak falta dira. Jakinaren gainean gaude proiektu honen dimentsioa handia dela, eta gida guztiz osatu bat egitea ezinezkoa dela, gure eskuetatik at geratzen baita. Oraindik gidan ageri ez den ekoizleek bertan parte hartzeko deia luzatzen diegu.

Albiste hau Topatu.eus-ek argitaratu du eta ARGIAra ekarri dugu CC by-sa lizentzia baliatuta


Kanal honetatik interesatuko zaizu: Elikadura
2024-04-25 | Estitxu Eizagirre
"Lurra taupaka" festara deitu du Amillubi proiektuak, maiatzaren 11n

Laborantza lur emankorrak ondasun kolektibo bilakatu nahi ditu Amillubi proiektuak. Horretarako herritarren eta hainbat kolektibo eta erakunderen ekarpenak biltzen ari da eta maiatzaren 11rako egun osoko festa antolatu du Amillubin bertan, egitasmoari bultzada emateko.


2024-04-25 | Estitxu Eizagirre
Marta Barba Gassó:
"Tomate hidroponikoa lur faltagatik jarri da eta lur falta monolaborantzaren ondorio da"

Tomateaz tesia egina du Marta Barba-k eta Egonarria saioan Eli Pagolarekin elkarrizketan azaldu du zer den hidroponia teknika. Bere hitzetan, gakoa da aztertzea "noiz eta zergatik" sartu zen hidroponia Euskal Herrian: "Lur arazoak daudelako. Eta lur arazoak daude... [+]


2024-04-22 | Garazi Zabaleta
Txaramela
Pasta ekologikoa, ortuko barazki eta espezieekin egina

Duela hamabi urte pasatxo ezagutu zuten elkar Izaskun Urbaneta Ocejok eta Ainara Baguer Gonzalezek, ingurumen hezkuntzako programa batean lanean ari zirela. Garaian, lurretik hurbilago egoteko gogoa zuten biek, teoriatik praktikara pasa eta proiektu bat martxan jartzekoa... [+]


2024-04-14 | Garazi Zabaleta
Jakiak ehuntzen
Zangoza inguruan tokiko elikadura sistema eraikitzen

Zergatik doa mundu guztia Iruñera erosketak egitera, gure eskualdean elikagai asko ekoizten bada? Zergatik da hain zaila bailara hauetako produktuak bailara hauetako dendetan topatzea?”, galdera horiei eta beste zenbaiti tiraka hasi ziren lanean Zangoza aldean duela... [+]


Porrotak, ikasketak, baso jangarriak

Bidaia hau hasi nuenean, ikuspuntu erromantikoz imajinatzen nituen baso jangarriak: zuhaitz artean ibili, fruitu goxoak dastatu, loreak usaindu... baina baso jangarriek badituzte arantza ugari ere, porrotak, erratak... Gaur, ikasketa politak eskaini dizkidaten porrot horietako... [+]


Eguneraketa berriak daude