Ehunka herritarrek salatu dituzte atxiloketak eta "jazarpen poliziala" Azpeitian

  • Jazarpen polizialik ez! Burgesiaren erasoaldia gelditu lelopean elkarretaratze jendetsua egin dute (igandez) 18:30ean hasita, plazan. Mugimendu sozialistako kideek hartu dute hitza, baina beste hainbat eragiletako kideak ere batu dira protestara, hala nola Ernai eta EH Bildu.


2021eko maiatzaren 24an - 08:21
Azpeitiko plazan elkarretaratzea. Argazkia: uztarria.eus.

Jendetza elkartu da gaur (maiatzak 23) arratsaldean plazan bart izandako atxiloketak eta "gehiegizko" indarkeria poliziala salatzeko, Jazarpen polizialik ez! Burgesiaren erasoaldia gelditu lelopean. Ertzaintzak lau gazte atxilotu zituen bart, gauerdian Izarraizko Atean hasitako istiluak tarteko. Hain zuzen, 19 urteko, 18 urteko, 15 urteko eta 14 urteko gazteak hartu zituzten atxilo, desordena publikoa egotzita. 

Kontzentrazioa amaitzean mugimendu sozialistako kideek hartu dute hitza, eta gertakariez egiten duten irakurketa partekatu dute. Nabarmendu dute haien ustez atzo Ertzaintzak erabili zuen biolentzia eta dispositibo poliziala aurrez kalkulatutakoa izan zela: "Besteak beste, asteazkenean gazte kuadrilla batzuei larunbatean istiluak egongo zirelako mehatxua bota zieten poliziak; atzo bertan arratsaldetik poliziaren presentzia oso nabarmena izan zen herrian –adibidez, arratsaldetik Azpeitiko industriagunean Ertzainatzaren hainbat antidisturbio zeuden– eta, oro har, aurreko asteetatik errepikatzen joan den gertakaria izan da poliziaren presentziarena".  Era berean, indar polizialek "muturreko biolentzia" erabili zutela salatu dute, gazteei emandako kolpeak eta foam jaurtigailuen erabilera adibide gisa jarrita. Azpimarratu dute beren salaketa "poliziari beste, horiei aginduak ematen dizkieten politikariei" zuzentzen dela, baita "osasun hondamendia eta estatu totalitarioa baimendu" duten alderdi politiko guztiei ere. "Agintariek eta politikari profesionalek osasun-larrialdiari aterabide poliziala ematea erabaki dute, eta horiek dira bizi dugun askatasunen ezabapenaren eta jazarpen polizialaren arduradun nagusiak. Zentzu horretan, pandemiaren aitzakia pean eta burgesiaren politikarien aginduz, poliziak herritarrak jazartzeko hartu duen ohitura salatzen dugu", adierazi dute. 

Horrez gain, Azpeitiko Udalak udaltzaingoaren bidez atzoko gertakarietan Ertzaintzarekin kolaboratu izana salatu dute mugimendu sozialistako kideek, eta esan dute Ertzaintzak eskuragarri izan zituela udaltzaingoaren zerbitzuak. Halaber,  "udalaren kudeaketa duen alderdiak salbuespen estatua eta alarma egoera baimendu izana" gaitzetsi dute, eta esan dute udalaren baliabideak sektore kolpatuenen mesedetan jartzeko eta arazoei zapalduen ikuspegitik aterabideak emateko erabili beharko liratekeela.

Atzoko gertakariak modukoak Euskal Herriko hainbat tokitan errepikatzen ari direla esan dute, eta testuinguru orokor bati erantzuten diotela: "COVID-19aren pandemiaren harira, politikariek polizia baliabideak handitu dituzte eta sektore sozialen aurkako eraso eta kriminalizazio saiakerak handitu dituzte". Horien aurrean antolatzearen beharrezkotasuna adierazi dute. Irakurketa osorik, hemen

Ernai eta EH Bildu ere gehiegikerien kontra

Ernaik eta EH Bilduk ere salatu dute atzoko jazarpen poliziala, eta protestara irten dira arratsaldeko deialdira batuz. Haiek ere atzoko gertaerak "aurrez antolatutako polizia-dispositiboa" zirela adierazi dute. "Ez da kasualitatea atzo arratsaldean Azpeitian Ertzaintzak egin zuen desfilearen ondoren horrelako berriekin esnatzea. Atzoko jazarpen poliziala ekintza isolatu batetik haratago doa". Era berean, Eusko Jaurlaritza eta EAJ jarri dituzte jopuntuan: "Pandemia egoeran urtebete pasa daramagu jada, eta oraindik ez dira gai izan egoerari adarretatik eusteko. Aginpide guztia Espainiar Estatuari utzi eta hark esandakoei men egitera mugatu da Eusko Jaurlaritza. Hala, ez du pauso bakar bat ere eman herritarren egoera honi aurre egiteko baliabideak eskaintzeko garaian". Hori EAJren "kudeaketa eredua" dela salatu dute. Ernairen arabera,  Ertzaintzak darabilen indarkeria eta jazarpenaren helburua "bat eta bakarra" da: "Sistema kapitalista heteropatriarkalak gehiengoaren bizkar gutxi batzuei suposatzen dien pribilegioak bermatzea". Ernaik eredu poliziala goitik behera aldatzearen beharra mahaigaineratu du: "Utzi gazteak jipoitzeari eta har itzazue behingoz geure bizi baldintzak hobetzeko neurriak, poltsikoei begirako politikak egin beharrean herriarentzako egin ezazue lan". Irakurketa osorik, hemen

EH Bilduk, bere aldetik, atzoko gertakariak "erabat lekuz kanpokoak eta desproportzionatuak" izan zirela adierazi du, eta babesa agertu die atxilotuei eta jipoituei. "Beste behin ere, agerian geratu da polizia eredua goitik behera aldatu beharra", adierazi dute. 

EAJ, prebentzio eske

Azpeitiko EAJk ere agertu du atzo gertatutakoaz duen iritzia. Alderdi jeltzaleak herrian jazotako gertaerak salatu ditu, eta azaldu du "bizikidetza arauak betearazteko" Ertzaintza nahiz Udaltzainen lanak beren babesa duela. Era berean, udal agintariei neurri prebentiboak har ditzatela eskatu diete, atzokoa bezalako gertakaririk ez errepikatzeko.


Irakurrienak
Matomo erabiliz
Azoka
Kanal honetatik interesatuko zaizu: Polizia gehiegikeria
Gomazko pilotak erabili al ditu Ertzaintzak Gasteizen, lehen aldiz Cabacasen heriotzaz geroztik?

Gasteizko Martxoaren 3ko manifestazioaren aurka oldartzean Ertzaintzak gomazko pilotak erabili zituela salatu zuten zenbait eragilek eta pertsonek sare sozialetan, argazkiz lagunduta. Salaketak ez zuen oihartzun handirik izan, baina egia balitz gertaera esanguratsu baten aurrean... [+]


Angel Berrueta omendu eta hogei urteren ostean aitortza ofizialik gabe jarraitzen duela salatu dute

Hogei urte bete dira ETA ez zion kartel bat jarri nahi ez zuelako Angel Berrueta hil zutenetik Espainiako polizia batek eta bere semeak. Iruñeko Donibane auzoan Berrueta omendu dute, eta justizia eta erreparazioa eskatu dituzte.

 


2024-03-14 | Irutxuloko Hitza
Alta eman diote Ertzaintzak zauritutako Realeko zaleari

PSGren aurkako partidaren aurretik izandako karga polizialean zauritu zuten pilotakada batez emakumea.


2024-03-08 | Axier Lopez
Eneko Andueza
"Ni ez naute inoiz pilota edo borra batekin jo, mugimendu horietan ez naizelako sekula egon"

PSE-EEko lehendakarigai Eneko Anduezari elkarrizketa egin diote Euskadi Irratian eta bere "konfiantza" adierazi dio Ertzaintzari azken asteotan eragin dituen karga eta zaurituen harira.


2024-03-08 | Axier Lopez
Ertzaintzak Gasteizen eragindako zenbait zaurituren irudiak argitara eman dituzte

Martxoaren 3ko manifestazioan Ertzaintzak foam jaurtigailuekin eta borrekin zauritu zituen zenbait herritarren argazkiak zabaldu ditu LAB sindikatuak, Poliziaren inpunitatea amaitzeko neurriak exijitzearekin batera.


Eguneraketa berriak daude