SOS Arrazakeriak salatu du Polizia manteroei oldartu zaiela Iruñean
Arrazekeriaren aurkako eragilearen arabera, pertsona baten aurka piperbeltz espraia erabili du Poliziak, eta hainbat lagun identifikatu dituzte. Foruzaingoak eta Udaltzaingoak baieztatu dute pertsona bat atxilotu dutela, "ez laguntzeagatik eta aurre egiteagatik".
Erasoa Iruñeko Karlos III etorbidean gertatu da, asteazken goizean. SOS Arrazakeriak sare sozialetan salatu du Foruzaingoa eta Udaltzaingoa etorbide horretan zeuden kaleko saltzaileei oldartu zaiela, horietako batzuk identifikatu dituztela eta euren materiala lapurtu dietela. Gainera, egoeraz kezkatuta lekura gerturatu diren pertsonei Poliziak isunekin mehatxu egin diela gaitzetsi du, eta horietako baten aurka piperbeltz espraia ere erabili dutela.
"Ez dugu onartuko eraso arrazistarik gure kaleetan. Erantzukizunak exijitzen ditugu", adierazi du SOS Arrazakeriak. Foruzaingoak eta Udaltzaingoak baieztatu dute mantero bat atxilotu dutela, "ez laguntzeagatik eta aurre egiteagatik".
