Bilboko Etxarri II gaztetxeko hustuketan, aurtengo apirilean, Ertzaintzak egindako kargetan galdu zuen barrabila Iker Aranak, foam bala batek bertan jota. Eta, hain zuzen ere, Aranak berak emandako materialean identifikatu dute tiro egin zion ertzaina, Radio Euskadik aurreratu duenez.

Ospitaletik atera berritan salatu zuen bere kasua Iker Aranak, auzokideen babesean. Bertan, adierazi zuen “justifika ezina” izan zela Ertzaintzaren esku hartzea, bera ez baitzegoen istiluen gunean, eta “geldirik” zeudela azpimarratu zuen, ez zutela arrazoirik tiro egiteko. Gehitu zuen tiro egin zion ertzainari aurpegia ikusi ziola, eta tiro egin zion ertzainak "min egiteko" intentzioa zuela.

Aranak salaketa jarri zuen, eta berak zeukan materiala bidali zuen salaketarekin bat. Hortik abiatuta, Aranari arrazoia eman zion Bingen Zupiria Eusko Jaurlaritzako Segurtasun sailburuak, adierazi baitzuen hura zegoen tokian ez zegoela istilurik, “ustez”. Are, gehitu zuen ertzaintzaren jokaera hura "desegokia" izan zitekeela.

Hain zuzen ere, Zupiriak aipatutako material horixe bera da, Radio Euskadiren arabera, orain identifikazioa ahalbidetu duena. Izan ere, material horren faltan, ezin zuten ertzain jakin bat identifikatu: tiro egiteko erabilitako arma jakinda, ertzain kopuru murritz bat izan zitekeen, baina ezin zitekeen jakin nor zen zehazki.