Une latzak eta gogorrak bizi izan dituztela oroitu arren, oso pozik agertu da Ainhoa Intxaurrandieta hedabideen aurrera. “Denborak bakoitza bere lekuan jartzen du eta arrazoia eman digu”, zioen. “Egin genuen gauza bakarra gizartearen defentsa bat izan zen”, gaineratu du. Iñaki Errazkinek une zailetan ondoan izan eta babestu izan dituztenak hartu ditu gogoan. “Gure ondoan egon eta laguntzen egon diren guztiei eskerrak ematea garrantzitsua da”. 

Espainiako Kontu Auzitegiak ezagutzera emandako epaia hartu du ahotan Madrilgo Kongresuko EHBilduren diputatu Marian Beitialarrangoitiak. “Sententziak argi uzten du, EHBilduren jardun politiko guztiaren helburua zela, gipuzkoar guztien interes ekonomiko, ingurumenezkoak eta osasuna bera babestea eta zaintzea”. 

“Gipuzkoarren interesen aurka ari zirela jakin, bazekiten”

EAJ eta PSE-k defendatzen zuten interesa ordea beste bat zela, “herrialde eta kanpoko elite ekonomiko eta enpresarialen interesa babestea”. Horren jakitun zirela jokatu zuten EHBilduren esanetan, eta honenbestez, “gipuzkoarren interesen aurka ari zirela ere jakin, bazekiten”. Eta gaineratzen zuen, “sententziak ere esaten du hartutako norabide okerra zuzentzeko aukera ere izan dutela, baina nahiago izan zutela ez egin, nahiago izan zutela bankuen eta eraikuntza enpresa handien interesak defendatu eta horretan jarraitzea”.

2019ko foru hauteskundeetarako EHBilduren zerrenda buru Juan Karlos Izagirrek garaiz gaudela gogorarazi du, “arazoa berbideratu eta soluzioak bilatzeko”. Konponbiderako aukerak badira bere ustez eta aukerok baliatu beharra daudela dio. “Gipuzkoar guztientzat, onena izango den soluzioa aurkitu behar dugu, konfrontaziorako bideak baztertuz”.