Iritsi da eguna AEBetako hauteskundeena; gaur argituko dute Joe Biden demokrataren eta Donald Trump errepublikanoaren artean zein ukanen duten ondoko lau urteetan presidente. Hautesleek presidentea hautatzeko ardura duten 538 ordezkari aukeratu beharko dituzte boto bidez –estatu bakoitzean ordezkari kopuru jakin bat aukeratu ohi dute, biztanleria kopuruaren arabera–. Demokrata zein errepublikanoek gutxienez 270 ordezkari batu beharko dituzte Joe Biden edo Donald Trump presidente izendatzeko. Hori horrela, boto kopuruan baino ordezkari kopuruan dute garaipenaren giltza.

Zundaketei segi, Joe Biden hautagai demokrata da irabazle aurreikusten, bederatzi puntuko aldearekin. Hala ere, ikusirik Trumpek komunikabide handiekin duen hurbiltasuna, ezin jakin fidatu daitekeen zundaketei. AEBetako biztanleria zatiturik da, eta tentsio handiz biziko dute gaurko bozketa.

Erdiak jada bozkatua du

Sekula baino jende gehiagok aurretik bozkatu du aldi honetan: 200 milioi bozkatzaileetatik erdiak jada bozkatua du korrespondentziaz. Arrazoi nagusia hauteskunde eguneko jende pilaketak saihestea izan da, baina horri gehitu behar zaio behin eta berriz iragarritako lehia estuaren arrazoia.  Hori horrela, errepublikanoen aurkako botoa mobilizatu dute azken asteetan Trumpen aurkariek. Bozketa hauek posta bidezkoak izanki, baliteke emaitzen ordua atzeratzea kontaketak  batez ere Trump eta Bidenen arteko tartea mehea baldin bada.

Duela lau urte heldu zen boterera Trump, Hillary Clintonen aurretik pasaz.