Desazkunde turistikorako hamasei proposamen aurkeztu ditu Bizilagunekin plataformak
Turismoaren inguruan eztabaida soziala bultzatu eta herritarren bizitzak erdigunean jartzea helburu duen Bizilagunekin plataformak agerraldia egin zuen apirilaren 16an, Donostiako San Jeronimo kaleko kriptan, desazkunde turistikoa sustatzeko hamasei proposamenekin.
Desazkundea helburu gisa finkatu dute plataformako kideek, turismo jasangarriaren kontzeptuak bere balioa galdu egin duela uste dutelako. Euren ustetan, Donostian gutxi batzuen negozioa herritarren gehiengoaren bizitzan kalteak sortzen ari da: etxebizitzaren arazoa areagotzen, enplegu prekarioa biderkatzen, hirigintza zentzugabea eragiten, merkataritza txikia itotzen, kultur eredu komertzialak sustatzen eta homogeneizaziora bideratzen, besteak beste”.
Horregatik, desazkunderako urratsak emateko ordua iritsi dela diote, eta hurrengo proposamenak garatu dituzte norabide horri heldu eta herritarren artean idarrak biltzeko:
1- Turismo ereduaz eztabaidatzeko gune publiko eta iraunkorra sortu.
2- Bizilagunen bizi baldintzak aztertzen dituen hiri-behatokia sortu.
3- Hiriak ez du monokultibo turistiko bat izan behar. Hiriko ekonomia orekatu baten alde, beste jarduera ekonomikoak bultzatu.
4- Merkataritza jardueretan egutegien eta ordutegien malgutzea eten (jai egunetan jai egitea, gauez dendak ez irekitzea…).
5- Hiri-markaren eta turismoaren sustapenerako aurrekontuak ezabatu (publizitate kanpainak, turismo-azokak…).
6-Pisu turistikoen kopurua murriztu eta mugatu.
7- Hotelen lizentzia esleipenak gelditu.
8- Hiriko gune saturatuen plan berezia eratu (mugikortasuna, hiri-espazioa, osasuna, merkataritza…).
9- Auzo-bizitza eta kale-bizitza ahalbideratzeko azpiegitura eta baliabideak eskaini (iturriak, eserlekuak, gune estaliak, kirolguneak…). Kalearen merkantilizazioari ez!
10- Elkarte eta eragile sozialen antolakuntza lanak erraztu, hiriaren bizitza eta nortasuna gorpuzten dutelako.
11- Jarduera kulturalen erabilera komertziala ekidin.
12- Hizkuntza ofizialen erabilerarako indarrean dagoen araudia betearazi, salbuespenik gabe.
13- Balio ekologikoa duten guneak zabaldu eta babestu.
14- Eskualde mailako beharren araberako mugikortasun eredua diseinatu. Garraio-azpiegitura erraldoiei uko egin.
15- Turismoak biztanleen osasunean eragiten dituen kalte zuzenak (estresa) aztertu eta hauen erreparaziorako neurriak hartu; bereziki gune saturatuetan.
16- Tasa turistikotik jasotako diru-sarrerak ongizate politiketara bideratu, inolaz ere ez jarduera turistikoak indartzera (sustapen jarduerak, azpiegitura turistikoak).
Albiste hau Irutxuloko Hitzak argitaratu du eta CC-by-sa lizentziari esker ekarri dugu.
Atacamako Desertua Fundazioak eremu horretako geoglifoak suntsitzen ari direla salatu du sare sozialetan; hainbat argazkiren bidez, basamortura 4x4 ibilgailuetan doazen bisitariak eragiten ari diren triskantza erakutsi dute. 1000 eta 1520 urteen artean egindako geoglifo handiak... [+]
EH Bildu, PSN, Geroa Bai eta Zurekin taldeek lege egitasmoa adostu dute, Iruñeko Alde Zaharrean etxe turistikoei lizentzia gehiago ez emateko. Akordioak “izaera prebentiboa” duen “hirigintza-aldaketa” du ardatz, hiru helbururen bueltan oinarrituta:... [+]
Etxebizitzen %20 baino gehiago jadanik bigarren etxebizitzak dira Ipar Euskal Herrian. Larrialdi klimatikoaz sentsibilizatzeko lau hilabetez, Nantesetik abiatu Alternatiba txirrindula itzulia, kostaldean zen aste buruan.
Zirrara eta pasioaren eroale da Arantxa Orbegozo Txitxi (Tolosa, 1962). Bizitza darama eskuetan eta hura eskaintzen dio zuzentzen zaion edonori. Atleta izan da, txirrindularia, eta bere buruari proposatu dizkion beste hainbat diziplinatan aritua. Hala eta guztiz ere, benetan... [+]
Kataluniako erkidegoko azken hauteskundeetatik eta Europako Parlamenturako bozen emaitzetatik abiatuta, presio turistiko handiena bizi duten Herrialde Katalanetako herrietan eskuin muturraren botoak nola egin duen gora aztertuko dugu artikulu honetan.
Udatiar gutxiago zenbatu dira uztailean Iparraldean. Departamenduko Turismo Agentziak egunean 200.000 bisitari zenbatu ditu, usaian 240.000 direlarik. Turista guttiago bai, baina aberatsagoak ere bai.
Ordenagailua itxi, txankletak jantzi, eguzki-kremaz laztandu. Nora zoaz oporretan? Oporrak egitea nonbaitera joatea dela normalizatu dugu, deskantsuak distantzia behar duelako, diogu. Eta bidaia egitean, turista bilakatuko gara, izendapen aldaketak deserosotasun bat sortzen... [+]
Bilboko AZET plataformak pisu turistiko bat okupatu zuen atzo, auzoaren turistifikazioa salatzeko.