Desazkunde turistikoaren aldeko Euskal Herriko topaketak egingo dituzte Donostian
BiziLagunEkin plataformak desazkunde turistikoaren aldeko Euskal Herriko topaketak iragarri ditu, Donostian, elkar ezagutzea, esperientziak partekatzea eta gogoeta kolektiboa egitea helburu. Egitarauaren xehetasunak datozen asteetan jakinaraziko dituzte.
"Herri eta eskualdeen turistifikazioari aurre egiten dioten pertsonen eta taldeen topaketak" antolatu dituzte Donostian hainbat eragilek. BiziLagunEkin turistifikazioaren kontrako plataformaren arabera, indar ekonomikoek, instituzio publikoek eta hedabide nagusiek turismo eredu "gastronomikoa, kulturala eta elitekoa" sustatzen dute. Sustapen horrek etxebizitza garestitzea, natura suntsitzea eta lan prekarietatea sortzen duela salatu dute, besteak beste. "Horren guztiaren aurrean, indarrak batu eta desazkunde turistikoaren bidetik alternatibak eraikitzeko unea da".
Urriaren 24 eta 25ean "ikasteko, eztabaidatzeko eta estrategiak pentsatzeko tarteak egongo dira; hitzaldiak mahai inguruak eta tailerrak antolatuko ditugu". Egitarauaren xehetasunak hurrengo asteetan egingo dituzte publiko. Bitartean inkesta ireki bat jarri dute martxan eztabaidarako gaiak proposatzeko eta topaketen informazio eguneratua jasotzeko:
Donostiako desazkunde turistikoaren aldeko BiziLagunEkin plataformak deituta, Europa hegoaldeko turistifikazioaren aurkako SET sarearekin koordinatu dute ekimena.
BiziLagunEkin desazkunde turistikoaren aldeko Donostiako plataformak ekainaren 15erako deitu du manifestazioa, Europa Hegoaldeko beste hainbat hiritako eragileek bezala. Turistifikazioa salatu eta hiri eredu alternatiboa aldarrikatuko dute.