EH Bilduk, Independenteek, Geroa Baik eta Zurekin Nafarroak akordio programatikoa sinatu dute eta Campión independenteak hartuko du Iruñerriko Mankomunitateko presidentetza. Horrela adostu dute erakunde honen gobernagarritasuna hurrengo lau urteetan bermatzeko. Horretarako ere, hiru indar politikoek eta independenteek parte hartuko duten gobernu-talde bat sortuko dute, "akordio programatiko honen ildoen garapenaren ikuspegi eraikitzaile eta aurrerakoia duten talde guztiei irekia".
Akordioak Mankomunitateko Batzar Nagusian dauden 54 udal-ordezkarietatik 31ren babesa lortu du eta gutxienez aldeko 28 behar zituen. EH Bilduk 16 biltzarkide jarri ditu, independenteen taldeak 9, Geroa Baik 4 eta Zurekin Nafarroak 3. UPNk 12 ordezkarirekin, PSNk 8rekin eta PPk 2rekin, berriz, boto zuria eman dute. Sinatzaileek, azken lau urteetan egin duten bezala, ildo beretik lan egiteko elkarlana espero dute.
Akordio programatikoa
Besteak beste, hondakinen tratamendua, uraren plan estrategikoa, eskualdeko parkeak, mugikortasun iraunkorra eta garraio publikoa, taxi zerbitzua, energia berdearen zerbitzu berria eta gobernantzaren arloko hobekuntzak aurreikusten ditu sinatutako akordioak.
Helburu zehatzagoei begira, Gongorako egoera konpontzeko proiektuarekin jarraitzea, "Arangurengo Udalarekin egindako akordioak betez"; hondakinen tratamendu egokia egiten duten norbanakoei eta erakundeei konpentsazioak proposatzea; bidegorria eta bizikleta elektrikoen zerbitzua Iruñerri osora hedatzea edota Ezkaba mendiaren kontserbazio plana aurrera eramatea aurreikusten dute.
