ARGIA.eus

2020ko urriaren 31

'Dasatskisi' film georgiarra garaile Zinemaldiaren sari-banaketa hotzenean

  • Dea Kulumbegashvili zuzendari georgiarraren Dasatskisi filma izan da Zinemaldiaren 68. edizioko irabazle nagusia, palmares ofizialeko lau sari eskuratuta. COVID-19ak erabat markatutako edizioa izan da aurtengoa eta Kursaal auditorioko galan ere nabaritu da hori larunbat gauean.

Gorka Bereziartua Mitxelena @gorka_bm
2020ko irailaren 26a
Dea Kulumbegashvili zuzendari georgiarra izan da larunbat gaueko irabazle nagusia. Bere pelikulak lau sari eskuratu ditu.

Kursaal erdi huts baten aurrean banatu dira Donostiako Zinemaldiaren 68. edizioko sariak. Segur aski antolatzaileek aurreikusia zuten gala hotz samarra izango zela larunbat gau honetakoa eta, horregatik, zuzeneko musika eta dantzarekin osatu nahi izan dute ikuskizuna, bide batez aurten zendu den Ennio Morricone musikariari omenaldi txiki bat eginez.

Sail Ofizialeko sariei dagokienez, irabazle argi bat utzi du gauak: Dea Kulumbegashvili zuzendari georgiarraren Dasatskisi / Beginning. Gidoi, zuzendari, emakumezko aktore eta pelikula onenaren sariak eskuartu ditu Jehovaren lekukoen komunitate batek jasaten duen eraso batetik abiatzen den pelikula berezi honek. 

Kulumbegashvili sari-banaketan bertan egon ahal izan den arren, irabazleetako askok bideo bidez eskertu dute saria. Hala gertatu da adibidez Druk film daniarra protagonizatzen duten lau aktoreekin: haiek irabazi dute gizonezko aktore onenaren Zilarrezko Maskorra; Nakuko wa ineega pelikula japoniarrak eskuratu du argazki onenaren saria (akats bat medio, saridunen izena esan aurretik haien bideoa pantailan agertu da) eta epaimahaiaren sari berezia berriz Julien Templek zuzendutako Crock of Gold: A Few Rounds with Shane MacGowan dokumentalak irabazi du. 

Bestalde, David Perez Sañudo zuzendariaren Ane pelikulak jaso du Euskal Zinemaren Irizar Saria. Maider Oleagak epaimahaiaren izenean hitz egin du galan eta, azaldu duenez, saria erabaki dutenek aho batez erabaki dute aipamen berezi bat egitea Amaia Merinok eta Miguel Angel Llamasek zuzendu duten Non dago Mikel? dokumentalari ere.

ARGIAn egiten dugun kazetaritza independenteak bultzada merezi duela uste duzu?

Informazio askea lantzen dugu ARGIAn, langileok gara proiektuaren jabeak eta gure informazioen atzean ez duzu sekula multinazionalik, bankurik edo alderdi politikorik topatuko. Gure ustez, burujabetza guztien oinarrian dago informazio burujabetza, ezagutzen dugunaren gainean pentsatzen eta erabakitzen dugu. Horregatik diogu kazetaritza independentea dela demokraziaren oinarrietako bat.

Aldizkaria paperean etxean edo e-postan PDFan jaso nahi duzu? Pozik hartuko zaitugu ARGIAko komunitatean. ARGIAkoa izateko, nahi eta ahal duzun ekarpena egin dezakezu, eta bueltan egoki ikusten duzuna eskatu. Indartu dezagun indartzen gaituena!

Kanal honetan artxibatua: Zinemaldia 2020

Zinemaldia 2020 kanaletik interesatuko zaizu...


Azkenak
EGILEA
Argia buletina
Egunaren laburpena
zure e-postan
Eguneraketa berriak daude