"Sumarioak ez du akusazioak mantentzeko oinarri juridikorik"

Judas polizia operazioan Herrialde Katalanetako bederatzi kide atxilotu eta espetxeratu zituen estatuak irailean. Hamabost egun direla jaso zituzten abokatuek sumarioko bederatzi liburukietatik zortzi. Alerta Solidariako bozeramaile Xavir Pellicer abokatuak azalpenak eman ditu prozedura judizialeran inguruan.

Izaera politikoa, ez juridikoa

Sumarioak agerian utzi du prozedura osoak izaera politikoa duela eta ez judiziala, baita inputatuei egozten zaizkien delituen frogarik ez dagoela ere, Pellicerren esanetan: "Sumarioak akusazioei eusteko oinarririk ez duela berresten dugu. Ez da sostengatzen terrorismo akusazioa, ez lehergaiak izatearena, ez suntsiketak eragitearena ere”.

Nabarmendu du lehergailuetan espezializatutako TEDAX polizia taldearen txostenak leherkarien aukera baztertzen duela. Terrorismo akusazioa ukatu du ere: "Terrorismo akusazioa protesta eta mobilizazioetan oinarritzen da. Eskubideak arriskuan jartzen ari dira”.

Euskal Herria style filtrazioak

Espainiako hedabideak Judas operazioaren inguruko filtrazioak zabaltzen hasi dira asteazkenetik. Sumarioaren edukiez gain, atxilotuetako batzuen epaile aurreko bideo deklarazioak ere argitaratu dituzte –konfiantzazko abokaturik izan ez zuten eta deklarazio inkulpatorioak egin zituzten bi espetxeratuenak–. Bideoetan epaile aurrean, eta atxilotuak izan aurretik poliziak grabatutako telefono elkarrizketetan, Kataluniako Parlamentua okupatzeko asmoaz, buruzagi politiko independentistekin duten harremanaz edo lehergailuak erabiltzeko asmoez hitz egiten dute atxilotuek.

Espainiako komunikabideen titular nagusia CDRek Parlamentua okupatu eta bertan aste betez gotortzeko asmoa zutela izan da, eta ekintza horren sustatzaileen artean Quim Torra Kataluniako presidentea zegoela. Informazio hori kontraesanean dago alderdi eta buruzagi politikoek urriaren 14ko sententziaren aurkako protestetan izan duten protagonismo eskasarekin eta oinarri independentistekiko erakutsitako urruntasunarekin. Okupazioa ez da gertatu, edonola dela.

Filtrazioak askoz gehiago izaten ari dira, ordea, Euskal Herrian ezaguna den "metodologiari" jarraiki, askoren ustez: titular deigarri eta asaldagarri asko, mamira joz gero despuztu egiten direnak gezur, egi-erdi eta testuingurutik kanpo ateratako ondorio desitxuratuen artean. Leherkariak, “leherkariak egiteko erabili daitezkeen osagaiak” bilakatzen dira; CDRen eta Tsunami Democractic-en arteko koordinazioa espetxeratuetako baten zeharkako aipamenean geratzen da; atxilotuetako baten argazkia ikusi daiteke metraileta bat eskuan, eta poliziak “arma egiazkoa edo faltsua den” ez duela zehaztu irakur daiteke argazki oinean. Eldiario.es agerkari digitala bera ere, estatuko hedabide ofizial handienen pare aritu da oraingoan.

Pellicerrek aipamena egin die zabaldutako informazio horiei. Lehenik eta behin, defendatu du filtratu diren atxilotuen deklarazioak ez dutela balio juridikorik, mehatxupean, atxilotuei loa galarazi ondoren eta konfiantzazko abokaturik gabe eginak direlako: “Deklarazio guztiak defentsa eskubidearen urraketa testuinguru argian egin dira”. Deklarazioak baliogabetzea eskatuko dute defentsek.

Parlamentua okupatzeko asmoei dagokienez, “egia balira” beste hainbat borroketan egiten diren protesta moduak direla adierazi du: "Mobilizazio independentistek edo sindikalek, ikasleenek, etxebizitzaren aldekoek... Espazio publikoak okupatu izan dituzte, eta egiten jarraituko dute. Ez dugu uste tankerako ekimenei delitu penal izaera eman behar zaienik”. Torrra presidenteak komunikatua argitaratu du deklarazio horien harira. Argitaratutakoei sinesgarritasuna ukatu die eta adierazi du ez duela inongo harremanik izan inputatuekin. Atxilotuek deklarazioak zein baldintzetan egin zituzten ikertu dadin eskatu du, eta haien defentsarako eskubidea bermatua izan dadila.

Beldurra eta mesfidantza sortu nahian

CDRen aurkako operazioak hainbat helburu dituela salatu du Alerta Solidariako abokatuak. Batetik, “jendartea beldurtu eta atxilotuei eta haien inguruneari mina sortu”; bestetik, “mugimendu independentistaren barnean hausturak eta mesfidantzak sortzea”.